ورلڈکپ میں افغانستان کی غیرمتوقع فتوحات کاسلسلہ جاری،سری لنکا کو بھی ہرادیا

فوٹو: سوشل میڈیا

پونا : بھارت میں جاری ٓئی سی سی ورلڈکپ میں افغانستان کی غیرمتوقع فتوحات کاسلسلہ جاری،سری لنکا کو بھی ہرادیا،ورلڈ کپ کے 30ویں میچ میں افغانستان نے سری لنکا کو باآسانی 7 وکٹوں سے شکست دی۔

سری لنکا سے اس فتح کے ساتھ افغانستان کی ٹیم پوائنٹس ٹیبل پر پانچویں پوزیشن پر پہنچ گئی جب کہ پاکستان کو مزید نیچے دھکیل دیا ہے۔ 

سری لنکا کا دیا گیا 242 رنز کا ہدف افغانستان نے 46ویں اوور میں حاصل کرلیا، اس کے ساتھ ہی افغان ٹیم سیمی فائنل کی دوڑ میں شامل ہوگئی۔ 

افغانستان کی ایونٹ میں تیسری کامیابی ہے اور تینوں مرتبہ اس نے سابقہ عالمی چیمپئن ٹیموں کو ہرایا، افغان ٹیم نے انگلینڈ ، پاکستان کے بعد سری لنکا کو بھی ہرادیا۔ 

پونے میں کھیلے گئے میچ میں افغانستان نے ٹاس جیت سری لنکا کو بیٹنگ کی دعوت دی،سری   لنکا کی جانب سے اننگز کا آغاز اوپننگ بیٹرز پتھم نسانکا اور دیموتھ کرونارتنے نے کیا۔

سری لنکا کی پہلی وکٹ 22 رنز پر دیموتھ کرونارتنے کی صورت میں گری، وہ 15 رنز بنا کر پویلین لوٹ گئے جبکہ دوسری وکٹ 82 رنز پر گری جب پتھم نسانکا 46 رنز بنا کر آؤٹ ہوئے۔

افغانستان کے خلاف سری لنکا کی تیسری وکٹ 134 رنز پر گری، سری لنکا کے کپتان کوشل مینڈیس 39 رنز پر مجیب الرحمٰن کے شکار ہوئے،اسکور 139 پر پہنچا تو مجیب نے ہی سدیرا سماراوکرما کو 36 رنز پر ایل بی ڈبلیو کر دیا۔

راشد خان نے سری لنکا کو اس وقت پانچ وکٹوں سے محروم کردیا جب انہوں نے دھننجیا ڈی سلوا کو 167 کے مجموعے پر کلین بولڈ کردیا۔ ڈی سلوا نے 14 رنز کی اننگز کھیلی۔ 

سری لنکا کی وکٹیں گرنے کا سلسلہ جاری رہا تاہم ٹیم کے آل آؤٹ ہونے تک ایجیلو میتھیوس نے 25 اور مہیش تھیکشنا نے 29 رنز کی ذمہ دارانہ اننگز کھیل کر ٹیم کو 240 کے ٹوٹل تک پہنچایا۔ 

افغانستان کی جانب سے فضل حق فاروقی نے 4 کھلاڑیوں کو آؤٹ کیا۔ مجیب الرحمان نے 2 جبکہ عظمت اللّٰہ عمرزئی اور راشد خان نے ایک ایک وکٹ لی۔

ہدف کے تعاقب میں جارح مزاج رحمان اللّٰہ گرباز صفر پر پویلین لوٹ گئے، انہیں دلشن مدھوشنکا نے آؤٹ کیا،اس کے بعد افغان بیٹرز نے ذمہ داری کا مظاہرہ کرتے ہوئے سری لنکن بیٹرز کو بے بسی کی تصویر بنادیا۔ 

دوسری وکٹ پر ابراہیم زادران اور رحمت شاہ کے درمیان 78 رنز کی پارٹنر شپ بنی، تو تیسری وکٹ پر رحمت شاہ اور کپتان حشمت اللّٰہ شاہدی کے درمیان 58 رنز کی پارٹنرشپ بنی۔

ابراہیم زادران 39 رنز بنا کر پویلین لوٹے، انہیں بھی مدھوشنکا نے آؤٹ کیا جبکہ رحمت شاہ 62 رنز بنا کر کاسن راجیتھا کی گیند پر کیچ آؤٹ ہوئے۔

افغانستان کی چوتھی وکٹ پر حشمت اللّٰہ شاہدی اور عظمت اللّٰہ عمر زئی کے درمیان 111 رنز کی ناقابلِ شکست پارٹنرشپ نے افغانستان کو ایونٹ میں تیسری فتح دلوادی،فضل حق فاروقی کو شاندار بولنگ پرفارمنس پر میچ کا بہترین کھلاڑی قرار دیا گیا۔