پاکستان کرکٹ ٹیم کا چیف سلیکٹر، لیجنڈ انضمام الحق ذمہ داری پھر سنبھال لی

فوٹو: فائل

لاہور: پاکستان کرکٹ ٹیم کا چیف سلیکٹر، لیجنڈ انضمام الحق ذمہ داری پھر سنبھال لی،پی سی بی نے جاری بیان میں کہا کہ سابق کپتان انضمام الحق کو پاکستان کرکٹ ٹیم کا چیف سلیکٹر مقرر کر دیا گیا ہے۔

سابق کپتان انضمام الحق پہلے بھی چیف سلیکٹر رہ چکے ہیں اور ان کی منتخب کردہ ٹیم نے 2017 میں آئی سی سی چیمپئنز ٹرافی جیتی تھی جب کہ وہ 2019 میں آئی سی سی ورلڈ کپ کے سیمی فائنل کے لیے کوالیفائی کرنے میں ناکام رہی تھی۔

انضمام الحق نے پچھلے دور میں کوچ مکی آرتھر کے ساتھ کام کر چکے ہیں ، آخری باری 2019 میں پی سی بی کی سلیکشن کمیٹی میں بطور چیف سلیکٹر ان کا آخری اسائنمنٹ تھا۔

Inzamam-ul-Haq delves into his appointment as chief selector, navigating challenges in the role and his drive to assemble a formidable team for upcoming events 🎙️🏏

More details ➡️ https://t.co/18o6YvUNmj pic.twitter.com/krVD487Iuo

— Pakistan Cricket (@TheRealPCB) August 7, 2023

انضمام الحق اس سے قبل 13-2012 میں مختصر مدت کے لیے پاکستانی ٹیم کے بیٹنگ کنسلٹنٹ کی حیثیت سے کام کر چکے ہیں جب کہ وہ افغانستان کی ٹیم کے ہیڈ کوچ کی حیثیت سے بھی کام کر چکے ہیں۔

انضمام الحق 1992 کے ورلڈ کپ کی فاتح ٹیم میں شامل تھے، وہ 378 ون ڈے انٹرنیشنل میں پاکستان کی طرف سے سب سے زیادہ 11 ہزار 739 رنز بنانے والے بلے باز ہیں جنہوں نے 10 سنچریاں اور 83 نصف سنچریاں بھی اسکور کیں۔

انہیں 120 ٹیسٹ میں 8 ہزار 830 رنز اسکور کرنے کا اعزاز بھی حاصل ہے جس میں 25 سنچریاں اور 46 نصف سنچریاں شامل ہیں۔

گزشتہ ہفتے ہی پاکستان کرکٹ بورڈ نے سابق کپتان مصباح الحق کی سربراہی میں اعلیٰ سطح کی کرکٹ ٹیکنیکل کمیٹی قائم کی تھی، جس میں انضمام الحق اور محمد حفیظ بھی شامل تھے۔

یہ کرکٹ ٹیکنیکل کمیٹی مجموعی ڈومیسٹک ڈھانچے، شیڈول، پلیئنگ کنڈیشنز، نیشنل سلیکشن کمیٹی کی تقرری، نیشنل ٹیم کے کوچز کی تقرری، سینٹرل اور ڈومیسٹک معاہدوں اور امپائرز، ریفریز اور کیوریٹرز کی بہتری کے منصوبوں پر سفارشات کے لیے تشکیل دی گئی تھی.