پاکستان کے ساتھ تعلقات مضبوط، تکنیکی و ترقیاتی منصوبوں پر بات چیت جاری ہے، امریکی محکمہ خارجہ

فائل:فوٹو

واشنگٹن: امریکی محکمہ خارجہ کے ترجمان ویدانت پٹیل کاکہنا ہے کہ پاکستان کے ساتھ تعلقات مضبوط ہیں اور تکنیکی و ترقیاتی منصوبوں پر بات چیت جاری ہے۔ انٹونی بلنکن اور بلاول بھٹو نے ٹیلی فونک بات چیت میں افغانستان میں استحکام سمیت باہمی دلچسپی کے متعدد امور پر بھی گفتگوکی

غیرملکی خبر رساں ادارے کے مطابق امریکی محکمہ خارجہ کے ڈپٹی ترجمان ویدانت پٹیل نے واشنگٹن میں ہفتہ وار بریفنگ کے دوران امریکی وزیر خارجہ انٹونی بلنکن کی اپنے پاکستانی ہم منصب بلاول بھٹو سے ٹیلی فونک گفتگو سے متعلق میڈیا کو آگاہ کیا۔

ایک سوال کے جواب میں ویدانت پٹیل نے بتایا کہ دونوں رہنماؤں نے ٹیلی فونک گفتگو میں شراکت داری کے عزم کا اعادہ کرتے ہوئے تکنیکی اور ترقیاتی اقدامات پر پیشرفت کا جائزہ لیا۔
امریکی محکمہ خارجہ کے ترجمان نے مزید بتایا کہ انٹونی بلنکن اور بلاول بھٹو نے ٹیلی فونک گفتگو میں افغانستان میں استحکام سمیت باہمی دلچسپی کے متعدد امور پر بھی بات چیت کی۔

امریکی ترجمان ویدانت پٹیل نے بھارتی ریاست منی پور میں خواتین کو گھمانے کے واقعے کی مذمت کرتے ہوئے مطالبہ کیا کہ بھارتی حکومت تمام نسلی و مذہبی اقلیتوں کے جان ومال کی حفاظت کو یقینی بنائے۔

امریکی محکمہ خارجہ کے ترجمان نے متاثرہ خواتین سے اظہار یکجہتی کرتے ہوئے کہا کہ خواتین کے احترام و وقار کو برقرار رکھنے اور ان کی حفاظت کو یقینی بنانا حکومت کی ذمہ داری ہے۔