سینئر صحافی عامرالیاس رانا کو تغمہ امتیاز سے نوازا گیا، دیگر شخصیات کو اعزازات ملے

فوٹو : فائل 

اسلام آباد: ایکسپریس نیوز کےبیورو چیف سینئر صحافی عامرالیاس رانا کو تغمہ امتیاز سے نوازا گیا، دیگر شخصیات کو اعزازات ملے ایوان صدر اسلام آباد میں پر وقار تقریب میں اعزازات دئیے گئے۔

عامرالیاس رانا کو تغمہ امتیاز سے نوازا گیا،انھیں صحافت کے شعبہ میں گراں قدر خدمات پریوم پاکستان کے موقع پرصدر مملکت ڈاکٹر عارف علوی نے اعزاز سے نوازا۔

بھائی عامر الیاس رانا کو مبارک باد pic.twitter.com/UWmYOKBCHn

— Tariqsumair (@Tariqsumair2) March 23, 2023

یوم پاکستان کے موقع پرایوان صدر میں خصوصی تقریب منعقد ہوئی جہاں ملک کیلئے مختلف شعبوں میں نمایاں خدمات انجام دینے والی شخصیات کو مختلف اعزازات سے نوازا گیا۔

یوم پاکستان کے موقع پر ایکسپریس نیوز کے ہی اینکر جاوید چوہدری کو بھی ستارہ امتیاز دیا گیا،ایوان صدر میں ہونے والی اس تقریب میںمختلف شعبوں میں نمایاں خدمات انجام دینے والی شخصیات کو مختلف اعزازات سے نوازا گیا۔

ایوان صدر میں ہونے والی تقریب میں بتایا گیا کہ عامر الیاس رانا کی ملکی اور بین الاقوامی معاملات پر گہری نظر ہے۔

 عامرالیاس رانا نے دنیا بھر میں بین الاقوامی کانفرنسوں بشمول نیوکلیئر سمٹ، اقوام متحدہ کی جنرل اسمبلی کے اجلاس، تاریخی آگرہ سمٹ، جاپان میں افغانستان پر بین الاقوامی ڈونرز کانفرنس، آذر بائیجان کے پارلیمانی انتخابات اور دیگر عالمی امور کی کوریج کی۔

اس موقع پر مختلف شعبوں سے تعلق رکھنے والی شخصیات کو بھی اعزازات سے نوازا گیا۔اسی طرح پنجاب، بلوچستان اور خیبرپختونخوا کے گورنر ہاؤس میں بھی اعزازات دینے کی تقریبات متعقد ہوئیں۔

صحافت کے شعبے میں گراں قدر خدمات پر دنیا نیوز کے پروگرام ’’نقطہ نظر‘‘ کے سینئر تجزیہ کار اور سینئر صحافی مجیب الرحمان شامی کو ہلال امتیاز سے نوازا گیا، جاوید چودھری اور ندیم ملک بھی ایوارڈ حاصل کرنے والوں میں شامل ہیں۔

مرحوم شاعر اور ادیب امجد اسلام امجد کا ایوارڈ ان کے بیٹے نے وصول کیا، مشہور شاعر ساغر صدیقی کو بھی ستارہ امتیاز بعد از وفات دیا گیا، ان کا ایوارڈ سیکرٹری وزارت قومی ورثہ نے وصول کیا۔

پی کے ایل آئی کے بورڈ آف گورنرز کے چیئرمین ڈاکٹر سعید اختر اور معروف سماجی رہنما رمضان چھیپا کو بھی اعزاز سے نوازا گیا۔معروف علمی شخصیت ڈاکٹر انیس احمد اور عالم دین مولانا حنیف جالندھری کو بھی اعزاز سے نوازا گیا۔

معروف اداکار بہروز سبزواری، میزبان اور گلوکار فخر عالم اور پاکستان کرکٹ ٹیم کے کپتان بابراعظم بھی اعزاز پانے والوں میں شامل ہیں، سکواش لیجنڈ جہانگیر خان اور جان شیر خان کو بھی اعزاز سے نوازا گیا۔

گورنر سندھ کامران خان ٹیسوری کو بھی نشان امتیاز سے نوازا گیا۔

ان کے علاوہ عوامی خدمات کے اعتراف میں سرتاج عزیز، میر حاصل بزنجو، رئیس الاحرار، چودھری غلام عباس خان مرحوم، جسٹس ریٹائرڈ رانا بھگوان داس (آنجہانی) کو اور احمد غلام علی چھاگلہ (مرحوم) کو موسیقی کے فن، صوفی غلام مصطفی تبسم (مرحوم) کو شاعری، محمد قوی خان کو ڈرامہ، فلم اور سٹیج اداکاری میں کارہائے نمایاں سرانجام دینے پر نشان امتیاز سے نوازا گیا، اداکار سہیل احمد نے ان کا ایوارڈ وصول کیا۔

صدر مملکت نے عامر نواز خان شہید ، محمد کامران شہید ، کرنل ریٹائرڈ محمد عارف ، محمد عثمان شہباز، ڈاکٹر کامران احمد، شیر احمد (فیصل بلوچ)، تنویر حسین، امجد احمد ، مظہر نوازشیخ ، بشیر احمد بروہی ، فرنٹیئر کانسٹیبلری کے ذیشان احمد ، نوید احمد، ضیاء الرحمان ، شہید جاوید اللہ ، ڈاکٹر اکبر ناصر انسپکٹر جنرل پولیس اسلام آباد ، سہیل ظفر چٹھہ ، صادق شاہ ، راجہ محمد ماجد ، محمد بلال راجہ ، مبشرسلیم ، منہاس احمد خان ، اعجاز حفیظ ، عقیل احمد صدیقی سمیت وسیم احمد خان کو بہادری پر تمغہ شجاعت سے نوازا۔