یونان میں خطرناک مواد لے جانے والا مال بردار طیارہ زمین بوس، 8 ارکان ہلاک

ایتھنز: یونان میں خطرناک مواد لے جانے والا مال بردار طیارہ زمین بوس ہوگیا جس سے اس میں خوفناک آگ بھڑک اُٹھی حادثے کےنتیجے میں پائلٹ سمیت عملے کے 8 ارکان موقع پر ہی ہلاک ہوگئے۔

غیر ملکی خبر رساں ادارے کے مطابق یونان میں مال بردار طیارہ ایک کھیت میں گر کر تباہ ہوگیا۔ طیارے کے گرتے ہی زوردار دھماکا ہوا اور طیارے میں سے آگ کا گولہ فضا میں بلند ہوا۔ خوفناک آگ سے طیارہ چند منٹوں میں ہی راکھ کے ڈھیر میں تبدیل ہوگیا۔

طیارے میں پائلٹ سمیت 8 عملے کے ارکان سوار تھے جو حادثے میں موقع پر ہی ہلاک ہوگئے۔ طیارے میں آگ لگنے کے دوران بھی دھماکوں کی آوازیں آتی رہیں جس سے اس بات کو تقویت ملتی ہے کہ اس میں خطرناک آتشی مواد ہوسکتا ہے۔

حکام کا کہنا ہے کہ مقامی رہائشیوں نے حادثے کے بعد دو گھنٹے تک آگ کا گولہ دیکھنے اور دھماکوں کی آوازیں سننے کی اطلاع دی جس میں جہاز میں سوار عملے کے آٹھ ارکان ہلاک ہو گئے۔