اسلام آباد( زمینی حقائق ڈاٹ کام) پٹرولیم مصنوعات کی قیمتوں میں اضافہ کے ساتھ ساتھ حکومت نے بجلی کی قیمتوں میں 7 روپے 91 پیسے فی یونٹ کا بڑا اضافہ کردیا ۔
حکومت نے بجلی بم نیپرا کے زریعے عوام کے سروں پر گرایا ہے اورنیشنل الیکٹرک اینڈ پاور ریگولیٹری اتھارٹی (نیپرا) نے ایک مرتبہ پھر قیمتوں میں اضافہ کردیا ہے۔
نیپرا کے نوٹیفکیشن کے مطابق 2022-23 کے لئے نیشنل اوسط ٹیرف 24 روپے 82 پیسے مقرر کیا گیا ہے، اس سے پہلے نیپرا کا تعین کردہ ٹیرف 16 روپے 91 پیسے تھا جو کہ اب بڑھ کر 24 روپے 82 پیسے ہو گیا۔
نیپرا نے ٹیرف وفاقی حکومت کو بھجوا دیا ہے جس کے بعد وفاقی حکومت اوسط اضافے پر نوٹیفکیشن جاری کرے گی، ٹیرف کا اطلاق وفاقی حکومت کے نوٹیفکیشن کے بعد ہوگا۔
نیشنل الیکٹرک اینڈ پاور ریگولیٹری اتھارٹی کے مطابق ٹیرف بڑھانے کی وجہ کیپسٹی لاگت، عالمی مارکیٹ میں ایندھن کی قیمت میں اضافہ ہے، روپے کی قدر میں کمی ہے۔
واضح رہے کہ حکومت اور آئی ایم ایف کے درمیان مذاکرات قطر کے دارالحکومت دوحہ میں ہوئے جس میں عالمی مالیاتی ادارے کی طرف سے فوری طور پر قسط جاری نہ کرنے اور پٹرولیم مصنوعات سمیت بجلی کے نرخوں میں اضافے کا کہا گیا تھا ۔
حکومت نے 26 مئی کو پٹرولیم مصنوعات کی قیمتوں میں 30 روپے تک کا بڑا اضافہ کیا تھا اور آج دو جون کو دوبارہ30روپے فی لیٹر اضافہ کرکے عوام کو مہنگائی کے شکنجے میں کس دیاہے۔
Comments are closed.