جنوبی وزیرستان،50جوانوں کی شہادت میں ملوث ٹی ٹی پی کمانڈرماراگیا

راولپنڈی ( زمینی حقائق ڈاٹ کام )جنوبی وزیرستان میں سیکیورٹی فورسز اور دہشت گردوں کی فائرنگ کے تبادلے میں کالعدم تحریک طالبان پاکستان کا کمانڈرنورستان عرف حسن بابا مارا گیا۔

آئی ایس پی آر سے جاری اعلامیہ کے مطابق سکیورٹی فورسز نے خفیہ اطلاعات پر جنوبی وزیرستان میں طیارزہ کے علاقے شرونگی میں بڑی کارروائی کی۔

سکیورٹی فورسز کی کارروائی کے دوران انتہائی مطلوب دہشت گرد کمانڈر نورستان عرف حسن بابا مارا گیا جو کہ سکیورٹی فورسز پر حملوں میں ملوث تھا۔

آئی ایس پی آر کے مطابق کمانڈر نورستان عرف حسن بابا انتہائی مطلوب دہشت گرد کمانڈر، ماسٹر ٹرینر اور بارودی سرنگوں کا ماہر تھا، اور 2007 سے اب تک فورسز کے 50 سے زائد جوانوں کو شہید کرنے میں ملوث رہا۔

مارا گیا کمانڈردہشت گرد نورستان وزیرستان میں بڑی دہشت گرد کارروائیوں کاماسٹر مائنڈ تھا، دہشت گرد کمانڈر نورستان2007ء میں بیت اللہ محسود گروپ میں شامل ہوا۔

کمانڈر نورستان عرف حسن بابا مارشل آرٹس کا ماہر تھا، اور اس نے شوال، خسیرا، شکئی اور وانا میں سیکیورٹی فورسز پر کئی حملے کئے، جس میں 50 سے زائد سکیورٹی اہلکار شہید ہوئے۔