طالبان تھک چکے ہم بھی افغان جنگ سے نکلنا چاہتے ہیں، ڈونلڈ ٹرمپ

واشنگٹن(ویب ڈیسک )امریکی صدر ڈونلڈ ٹرمپ نے افغانستان اور شام سے امریکی فوجیوں کے انخلاء تاہم عراق میں فوج رکھنے کا فیصلہ کیا ہے۔

امریکی نشریاتی ادارے سی بی ایس کے پروگرام فیس دی نیشن کو انٹرویو دیتے ہوئے امریکی صدر کا کہنا تھا طالبان امن چاہتے ہیں اور ہم بھی نہ ختم ہونے والی جنگ سے نکلنا چاہتے ہیں۔

انہوں نے افغان جنگ میں امریکی فوج کو بھاری مالی و جانی نقصان کا اعتراف کرتے ہوئے کہا کہ طالبان بھی اب تھک کر جنگ بندی چاہتے ہیں اور امن کا راستہ اختیار کرنے کیلئے تیار ہیں۔

امریکی صدر نے کہا نہ صرف طالبان بلکہ ہر کوئی اس طویل جنگ سے تھک چکا ہے، خود امریکا بھی اس نہ ختم ہونے والی جنگ سے نکلنا چاہتا ہے۔

ٹرمپ نے کہا کہ حالات کا جائزہ لینے کے لیے افغانستان اور دیگر ممالک میں ہماری انٹیلی جنس رہے گی اور اگر انخلا کے بعد کوئی مسئلہ ہوا تو اس کو حل کریں گے لیکن اس وقت تو امریکی فوجوں کو کئی سال سے جاری جنگوں سے واپس لانا چاہتے ہیں۔

امریکی صدر کا کہنا تھا کہ عراق اور شام سے داعش کا 99 وے فیصد خاتمہ کر دیا ہے، جلد ہی مکمل صفایا بھی کر دیں گے، عراق سے اپنے اڈے خالی نہیں کریں گے، بلکہ وہاں سے ایران پر نظر رکھیں گے۔