فوٹو : فائل
اسلام آباد: الیکشن کمیشن نے بالآخر اسلام آباد میں بلدیاتی انتخابات کرانے کا حکم دے دیا ہے اور وفاقی دارالحکومت اسلام آباد میں بلدیاتی انتخابات میں تاخیر کے معاملے پر الیکشن کمیشن آف پاکستان نے محفوظ فیصلہ جاری کرتے ہوئے بلدیاتی انتخابات کروانے کا باضابطہ اعلان کر دیا ہے۔
الیکشن کمیشن کے فیصلے میں کہا گیا ہے کہ اسلام آباد لوکل گورنمنٹ ایکٹ 2015 میں کی گئی حالیہ ترمیم آئین اور قانون سے متصادم ہے، اس لیے اس ترمیم کی روشنی میں کوئی اقدام قابلِ قبول نہیں۔
فیصلہ میں الیکشن کمیشن نے واضح کیا کہ خواتین اور دیگر مخصوص نشستوں پر انتخابات کرانے کا اختیار سیکرٹری لوکل گورنمنٹ کو نہیں دیا جا سکتا۔
فیصلے کے مطابق ڈی آر او، آر او اور انتخابی عملہ کی تعیناتی صرف الیکشن کمیشن کی ذمہ داری ہے، اور یہ اختیار کسی اور ادارے یا افسر کو تفویض نہیں کیا جا سکتا۔
الیکشن کمیشن اپنے افسران عدلیہ یا انتظامیہ میں سے انتخابی عملے کا تقرر کرے گا۔ فیصلے میں کہا گیا کہ سیکرٹری لوکل گورنمنٹ سرکاری افسر کی تعریف پر پورا نہیں اترتا، اس لیے وہ انتخابی عملہ کی تعیناتی نہیں کر سکتاہے۔
الیکشن کمیشن نے متعلقہ ونگ کو بلدیاتی انتخابات کے شیڈول کی فوری تیاری کا حکم بھی جاری کر دیا ہے، جس کے بعد وفاقی دارالحکومت میں الیکشن کی تاریخ کا اعلان کسی بھی وقت متوقع ہے۔
الیکشن کمیشن نے بالآخر اسلام آباد میں بلدیاتی انتخابات کرانے کا حکم دے دیا
Comments are closed.