پاکستان نے پہلے ایک روزہ میچ میں سری لنکا کو 6 رنز سے شکست دیدی

فوٹو : کرک انفو

راولپنڈی : پاکستان نے پہلے ایک روزہ میچ میں سری لنکا کو 6 رنز سے شکست دیدی،سری لنکا کی ٹیم 300 رنز کے ہدف کے تعاقب میں مقررہ 50 اوورز میں 9 وکٹ پر 293 رنز ہی بناسکی۔

سری لنکا کی طرف سے بولنگ میں 3 وکٹ لینے والے ونندوہسارانگا بیٹنگ میں بھی شاندار پرفارمنس دی اور مشکل صورتحال میں 59 کی اننگز کھیلی تاہم وہ میچ فنش نہ کر سکے۔

مہمان ٹیم سری لنکا کی طرف سے سمارا وکرما نے 39، کامل مشرا 38، کپتان چیریتھ اسالنکا 32 کے ساتھ نمایاں بیٹر رہے۔پاکستان کی بولنگ لائن نے 31 ایکسٹرا رنز بھی سری لنکن ٹوٹل میں بڑا اضافہ ثابت ہوئے، ان میں 26 وائیڈ بالز تھیں۔

پاکستان کی طرف سے حارث روف نے 4، فہیم اشرف اور نسیم شاہ نے 2، 2 جبکہ 1 وکٹ محمد نواز کے نام رہی۔

اس سے قبل راولپنڈی کرکٹ اسٹیدیم پر کھیلے گئے میچ میں سلمان علی آغا نے سری لنکن بولنگ لائن کے خلاف شاندار ناقابل شکست سنچری اسکور کی، جس کی بدولت پاکستان نے 5 وکٹ پر 299 رنز بنائے۔

سلمان علی آغا نے 83 گیندوں پر 9 چوکوں کی مدد سے سنچری بنائی، وہ 87 گیندوں پر 105 رنز کے ساتھ ناٹ آؤٹ پویلین لوٹے، یہ ان کی ایک روزہ کرکٹ کی دوسری سنچری ہے۔ عمدہ پرفارمنس میں انہیں پلیئر آف دی میچ قرار دیا گیا۔

چھٹی وکٹ پر سلمان علی آغا کے ساتھ 66 رنز کی شراکت بنانے والے محمد نواز 36 رنز بناکر ناٹ آؤٹ رہے۔دیگر کھلاڑیوں میں حسین طلعت 62، فخر زمان 32 اور بابراعظم 29 رنز کے ساتھ نمایاں بیٹر تھے جبکہ صائم ایوب 6 اور محمد رضوان نے 5 رنز بنائے تھے۔

سری لنکا کے بولر ونندوہسارانگا نے 54 رنز کے عوض 3 پاکستانی بیٹرز کو پویلین بھیجا تھا۔ سری لنکا نے پاکستان کے خلاف ٹاس جیت کر فیلڈنگ کا فیصلہ کیا تھا۔

قومی ٹیم کے کپتان شاہین شاہ آفریدی نے ٹاس کے موقع پر گفتگو کرتے ہوئے کہا تھا کہ ٹاس جیت کر ہم بھی فیلڈنگ ہی کرتے، ہم اس سیریز میں بھی پچھلی سیریز کی طرح اچھا کرنے کی کوشش کریں گے۔

سری لنکن کپتان چیریتھ اسالنکا نے کہا کہ ہم سیریز میں اچھا کھیل پیش کرنے کی کوشش کریں گے۔

پاکستان اور سری لنکا کے درمیان دوسرا ون ڈے 13 نومبر جبکہ تیسرا 15 نومبر کو کھیلا جائے گا۔