فوٹو : پی آر
اسلام آباد: ہلال احمر پاکستان کی چیئرپرسن محترمہ فرزانہ نائیک نے ناروے ریڈ کراس کی صدر محترمہ سیری ہیٹلن سے اوسلو میں اہم ملاقات کی۔ ملاقات میں پاکستان میں موسمیاتی تبدیلیوں سے متاثرہ کمیونٹیز کے لیے انسانی ہمدردی کے تعاون کو مزید مستحکم کرنے اور زیادہ سے زیادہ امداد کی فراہمی کے امکانات پر تبادلہ خیال کیا گیا۔
محترمہ فرزانہ نائیک نے کہا کہ ناروے کا یہ دورہ پاکستان میں ماحولیاتی تبدیلیوں کے باعث تباہی جھیلنے والی کمیونٹیز کی وکالت کا حصہ ہے۔ ان کا کہنا تھا کہ مقصد زیادہ سے زیادہ بین الاقوامی امداد اور گرانٹس کا حصول ہے تاکہ بالخصوص صحت عامہ کے شعبے میں سیلاب متاثرین کے لیے طویل المدتی بحالی کو یقینی بنایا جا سکے۔
انہوں نے زور دیا کہ پاکستان کو عالمی امداد کی فہرست میں اولین ترجیح ملنی چاہیے کیونکہ ماحولیاتی تبدیلیوں کے اثرات کا سب سے زیادہ سامنا پاکستان کو ہے۔
اس موقع پر ناروے ریڈ کراس کی صدر سیری ہیٹلن نے ہلال احمر پاکستان کے ساتھ 20 برسوں پر محیط پائیدار تعاون کو سراہتے ہوئے کہا کہ صحت عامہ، صاف پانی، صفائی ستھرائی اور آفات سے نمٹنے کے شعبوں میں مشترکہ کام پر ہمیں فخر ہے۔
انہوں نے ہلال احمر پاکستان کی قیادت میں شروع کیے گئے "ٹرانسفارمیشن پلان” کو بھی خراجِ تحسین پیش کیا۔
اپنے دورے کے دوران محترمہ فرزانہ نائیک نے ناروے ریڈ کراس کے قائم مقام سیکرٹری جنرل مسٹر سیمن ساکسبل اور ناروے کی ایجنسی برائے ترقیاتی تعاون (NORAD) کے ہیومینیٹیرین ڈیپارٹمنٹ کے ڈائریکٹر مسٹر ایرک ابِلڈ سے بھی ملاقاتیں کیں۔
ان ملاقاتوں میں موسمیاتی تبدیلی سے ہم آہنگ صحت عامہ کے نظام، قدرتی آفات اور مسلح تنازعات پر انسانی ردعمل کو مزید موثر بنانے اور افغان مہاجرین کی ضروریات پر بات کی گئی۔
یہ دورہ ہلال احمر پاکستان اور ناروے ریڈ کراس کے مشترکہ انسانی مشن کو مزید مضبوط بنانے کی اہم پیش رفت قرار دیا جا رہا ہے تاکہ انسانی تکالیف کم کی جا سکیں اور پائیدار کمیونٹیز تشکیل دی جا سکیں۔
ہلال احمر پاکستان اور ناروے ریڈ کراس کا انسانی ہمدردی تعاون بڑھانے پر اتفاق
Comments are closed.