وزیراعظم شہباز شریف اور فیلڈ مارشل کی امریکی صدر ڈونلڈ ٹرمپ سے اہم ملاقات، تعلقات میں نئی پیش رفت

فوٹو : سکرین شاٹ 

واشنگٹن: وزیراعظم شہباز شریف اور فیلڈ مارشل عاصم منیر نے امریکا کے صدر ڈونلڈ ٹرمپ سے ملاقات کی، جو خوشگوار اور مثبت ماحول میں منعقد ہوئی۔ ملاقات کے دوران دوطرفہ تعلقات، خطے کی صورتحال اور عالمی امن پر تفصیلی گفتگو کی گئی۔

وزیراعظم آفس کے مطابق شہباز شریف نے صدر ٹرمپ کو امن کا علمبردار قرار دیتے ہوئے کہا کہ امریکی صدر دنیا بھر میں تنازعات کے خاتمے کے لیے عملی کوششیں کر رہے ہیں۔ انہوں نے صدر ٹرمپ کی جرات مندانہ اور فیصلہ کن قیادت کو سراہا اور اعتراف کیا کہ امریکا نے پاکستان اور بھارت کے درمیان کشیدگی کم کرنے اور جنگ بندی کے لیے کلیدی کردار ادا کیا۔

اعلامیے کے مطابق وزیراعظم نے اس بات پر زور دیا کہ صدر ٹرمپ نے جنوبی ایشیا میں بڑی تباہی کو ٹالنے میں مدد فراہم کی، جبکہ مسلم دنیا کے رہنماؤں کو اعتماد میں لینے پر بھی ان کا شکریہ ادا کیا۔

ملاقات میں وزیراعظم نے پاکستان اور امریکا کے درمیان تجارتی تعلقات میں بہتری پر اطمینان ظاہر کیا اور امریکی کمپنیوں کو آئی ٹی، توانائی اور معدنیات کے شعبوں میں سرمایہ کاری کی دعوت دی۔

اس موقع پر انہوں نے انسداد دہشت گردی کے لیے تعاون میں اضافے پر زور دیا اور پاکستان کے کردار کو سراہنے پر صدر ٹرمپ کا شکریہ بھی ادا کیا۔

وزیراعظم شہباز شریف نے امریکی صدر کو دورہ پاکستان کی دعوت بھی دی، جسے صدر ٹرمپ نے خوش دلی سے قبول کیا۔

وزیراعظم شہباز شریف اور فیلڈ مارشل کی امریکی صدر ڈونلڈ ٹرمپ سے اہم ملاقات، تعلقات میں نئی پیش رفت