امریکی صدر ٹرمپ کی افغانستان کو دھمکی، بگرام ائیر بیس واپس نہ کرنے پر سنگین نتائج کا انتباہ

فوٹو : فائل 

واشنگٹن : امریکی صدر ڈونلڈ ٹرمپ نے سخت لہجے میں دھمکی دی ہے کہ اگر افغانستان نے بگرام ائیربیس امریکا کو واپس نہیں دیا تو سنگین نتائج برآمد ہوں گے۔

ٹرمپ نے اپنی سوشل میڈیا پلیٹ فارم ٹروتھ سوشل پر بیان جاری کرتے ہوئے کہا کہ "اگر افغانستان بگرام ائیربیس واپس نہیں دیتا، جسے بنانے والا امریکا ہے، تو یہ بہت برا ہوگا۔”

https://https://x.com/TrumpTruthOnX/status/1969515167890489800?t=hBPNa4CbsXkTNO0WkZKU4g&s=19

امریکی اخبار کے مطابق امریکا اور طالبان کے درمیان اس وقت انسدادِ دہشت گردی کارروائیوں سے متعلق مذاکرات جاری ہیں، جن میں بگرام ائیربیس پر محدود تعداد میں امریکی فوجی تعینات کرنے پر غور کیا جا رہا ہے۔ ان مذاکرات کی قیادت امریکی نمائندہ خصوصی ایڈم بوہلر کر رہے ہیں۔

اس سے قبل بھی ڈونلڈ ٹرمپ یہ کہہ چکے ہیں کہ امریکا کو بگرام ائیربیس کسی صورت نہیں چھوڑنا چاہیے تھا۔ ان کا کہنا تھا کہ واشنگٹن بگرام فوجی ائیر بیس دوبارہ حاصل کرنے کی کوشش کر رہا ہے کیونکہ یہ اس مقام سے محض ایک گھنٹے کے فاصلے پر واقع ہے جہاں چین اپنے جوہری ہتھیار تیار کرتا ہے۔

واضح رہے کہ چند روز قبل برطانیہ کے دورے کے موقع پر ٹرمپ نے برطانوی وزیر اعظم کیئر اسٹارمر کے ساتھ پریس کانفرنس میں کہا تھا کہ "ہم نے طالبان کو بگرام ائیر بیس مفت میں دے دیا، لیکن اب ہم اسے واپس لینے کی کوشش کر رہے ہیں۔

” ٹرمپ کے اس بیان پر برطانوی وزیر اعظم کے چہرے کے تاثرات یکدم تبدیل ہوگئے اور وہ حیرت سے امریکی صدر کو دیکھنے لگے۔

یاد رہے کہ 2021 میں افغانستان سے غیر ملکی افواج کے انخلا کے دوران امریکا نے 20 سال بعد بگرام ائیربیس افغان حکام کے حوالے کر دیا تھا۔

اب صدر ٹرمپ نے نہ صرف انخلا کے وقت چھوڑا گیا اسلحہ واپس لینے کا اعلان کیا ہے بلکہ بگرام ائیر بیس کی واپسی کے لیے بھی باضابطہ طور پر افغانستان کے ساتھ مذاکرات کا آغاز کر دیا ہے۔

امریکی صدر ٹرمپ کی افغانستان کو دھمکی، بگرام ائیر بیس واپس نہ کرنے پر سنگین نتائج کا انتباہ