وزیر داخلہ محسن نقوی کا اب وزیراعظم بننا نا ممکن ہو چکا، رانا ثناء اللہ

فوٹو : فائل 

اسلام آباد : وزیراعظم کے مشیر برائے سیاسی امور رانا ثناء اللّٰہ نے کہا ہے کہ  وزیر داخلہ محسن نقوی کا اب وزیراعظم بننا نا ممکن ہو چکا، رانا ثناء اللہ کا کہنا ہے اب پلوں کے نیچے سے بہت سا پانی بہہ چکا ہے۔

 نجی ٹی وی جیو نیوز کے پروگرام جرگہ میں گفتگو کرتے ہوئے رانا ثناء اللّٰہ نے اپنے وزیر داخلہ بننے کی خبروں کو بھی مسترد کرتے ہوئے کہا کہ ایسی کوئی تجویز زیر غور نہیں ہے۔

 رپورٹ کے مطابق رانا ثناء اللّٰہ کا تفصیلی انٹرویو آج رات 10 بجے جیو نیوز پر پروگرام جرگہ میں نشر ہوگا۔

 دوسری جانب فیصل آباد میں تقریب سے خطاب کرتے ہوئے رانا ثناء اللّٰہ نے  سعودی عرب سے معاہدے پر کہا  کہ ایک سیاسی اور دوسری عسکری قوت ہے، جب یہ دونوں قوتیں سامنے آتی ہیں تو اس کو پھر ورلڈ سُپر پاور ہی کہا جاتا ہے۔

انہوں نے کہا کہ اب جو پاکستان کے خلاف جارحیت کے عزائم رکھتے ہیں ان کو بھی سوچنا ہوگا کہ کیا ان کو ٹیبل پر بیٹھ کر معاملات حل کرنے ہیں یا مزید ذلت کا سامنا کرنا ہے۔