پاکستان نے بھارت کیخلاف میچ کا ٹاس جیت لیا، پہلے خود بیٹنگ کرنے کا فیصلہ

فوٹو : سوشل میڈیا

دبئی : پاکستان نے بھارت کیخلاف میچ کا ٹاس جیت لیا، پہلے خود بیٹنگ کرنے کا فیصلہ کیا ہے، آج ایشیاکپ ٹی ٹوئنٹی ٹورنامنٹ 2025 کے چھٹا میچ پاکستان اور روایتی حریف بھارت کے درمیان دبئی اسٹیڈیم میں کھیلا جا رہا ہے۔

دونوں ٹیموں نے اپنا پہلا میچ جیتنے والے 11 کھلآڑیوں پر اعتماد کا اظہار کیا ہے، کوئی تبدیلی نہیں کی گئی، پاکستان ٹیم ان ہی 11 کھلاڑیوں کے ساتھ میدان میں اتری ہے جنھوں نے عمان کے خلاف پاکستان کو 93 رنز سے فتح دلوائی تھی۔

گزشتہ 6 ماہ کے دوران دونوں ٹیمیں دوسری بار آمنے سامنے ہیں، اس سے قبل پاکستان اور بھارت چیمپئنز ٹرافی کے میچ میں مدمقابل آئے تھے۔

بھارت نے ایشیا کپ میں متحدہ عرب امارات کے خلاف 9 وکٹوں سے فتح حاصل کی جبکہ پاکستان نے افغانستان اور یو اے ای کو شکست دے کر سہ ملکی سیریز اپنے نام کی۔

ایشیا کپ میں بھارت نے اب تک 19 میچوں میں سے 10 میں کامیابی حاصل کی جبکہ پاکستان نے 6 جیتے ہیں۔ پاکستان کی بھارت کے خلاف ایشیا کپ میں آخری فتح 2022 میں آئی تھی۔

بھارت 8 بار ایشیا کپ کا چیمپئن بن چکا ہے جبکہ پاکستان نے یہ اعزاز صرف 2 مرتبہ حاصل کیا ہے۔