انگلینڈ نے جنوبی افریقہ کیخلاف ٹی ٹوئنٹی کرکٹ کی نئی تاریخ رقم کر دی

فوٹو : کرک انفو

اولڈ ٹریفورڈ : انگلینڈ نے جنوبی افریقہ کیخلاف ٹی ٹوئنٹی کرکٹ کی نئی تاریخ رقم کر دی، انگلش بلے بازوں نے ٹی ٹوئنٹی میچ نہ صرف جیتا بلکہ پہلی بار 300 رنز کا ہندسہ عبور کیا.

اولڈ ٹریفورڈ میں کھیلے گئے میچ میں میزبان انگلینڈ نے 2 وکٹوں پر 304 رنز کا پہاڑ کھڑا کر کے سیریز 1-1 سے برابر کر دی۔

فل سالٹ نے انگلینڈ کی ٹی 20 تاریخ کی تیز ترین سنچری اسکور کرتے ہوئے ٹیم کو جنوبی افریقا کے خلاف تاریخی جیت دلائی۔

فل سالٹ نے محض 39 گیندوں پر سنچری بنا کر لیام لیونگسٹون کا ریکارڈ توڑ دیا، وہ 60 گیندوں پر 141 رنز بنانے میں کامیاب رہے۔ لیام لیونگسٹون نے 2021 میں پاکستان کے خلاف ٹی 20 سیریز میں 42 گیندوں پر سنچری اسکور کی تھی۔

جوس بٹلر نے بھی شاندار بیٹنگ کا مظاہرہ کرتے ہوئے 30 گیندوں پر 83 رنز بنائے اور سالٹ کے ساتھ 126 رنز کی شراکت قائم کی۔ جیکب بیتھیل نے 24 رنز اور کپتان ہیری بروک نے 21 گیندوں پر 41 رنز کی ناقابلِ شکست اننگز کھیلی۔

انگلینڈ نے جنوبی افریقی بولرز کا بھرکس نکال دیا، ٹی 20کرکٹ میں نئی تاریخ رقم کردی، ہدف کے تعاقب میں جنوبی افریقا کے اوپنرز ایڈن مرکرم اور رائن رکلٹن نے جارحانہ آغاز کرتے ہوئے 22 گیندوں پر 50 رنز بنائے۔

تاہم جوفرا آرچر نے شاندار بولنگ کرتے ہوئے 2 کھلاڑیوں کو پویلین بھیجا۔ آرچر نے 25 رنز کے عوض 3 وکٹیں حاصل کیں جبکہ سیم کرن نے 11 رنز کے عوض 2 شکار کیے۔

جنوبی افریقہ نے انگلینڈ کے خلاف 158 رنز بنائے اور ٹیم آل آؤٹ ہوگئی۔ انگلینڈ نے میچ 146 رنز سے اپنے نام کیا۔ سیریز کا فیصلہ کن میچ اتوار کو ٹرینٹ برج میں کھیلا جائے گا۔