متحدہ عرب امارات کی ٹیم جیت کے قریب پہنچ کر افغانستان سے ہار گئی

فوٹو : سوشل میڈیا

شارجہ : متحدہ عرب امارات کی ٹیم جیت کے قریب پہنچ کر افغانستان سے ہار گئی، آخری تین بالز پر 5رنز درکار تھے مگر افغان باولر فرید نے میزبان جارح مزاج بیٹر آصف کو یہ رنز نہ کرنے دئیے اور وہ آخری بال پر گرباز کے ہاتھوں کیچ آوٹ ہو گئے.

سہ ملکی ٹی 20 سیریز کے چھٹے اور آخری لیگ میچ میں افغانستان نے متحدہ عرب امارات کو دلچسپ مقابلے کے بعد 4 رنز سے شکست دے دی۔

شارجہ میں کھیلے گئے میچ میں افغانستان ٹیم نے 171 رنز کا ہدف دیا جس کے تعاقب میں یو اے ای ٹیم 166 رنز بناسکی ہے،افغان ٹیم کے کپتان ابراہیم زادران میچ کے بہترین کھلاڑی قرار پائے ہیں۔

میزبان یو اے ای کے کپتان محمد وسیم نے 44، آصف خان نے 40، علی شان شرافو 27 اور محمد ذوہیب 23 رنز کے ساتھ نمایاں اسکور رہے۔

افغانستان کی طرف سے فرید احمد، مجیب الرحمان، شراف الدین اشرف، نور احمد اور عبداللّٰہ احمد زئی نے 1، 1 وکٹ حاصل کی۔

اس سے قبل پہلے بیٹنگ کرتے ہوئے افغانستان نے ابراہیم زادران کے 48 اور رحمان اللّٰہ گرباز 40 رنز کی بدولت مقررہ 20 اوورز میں 4 وکٹوں کے نقصان پر 170 رنز بنائے۔

گل بدین نائب نے آل راؤنڈر عظمت اللہ عمرزئی کے ساتھ مل کر افغانستان کے لیے شاندار اختتام کیا، جب انہوں نے محض 18 گیندوں پر ناقابل شکست 40 رنز کی شراکت داری قائم کی۔

گل بدین نائب 14 گیندوں پر 20 رنز بنا کر ناٹ آؤٹ رہے جبکہ عمرزئی نے 9 گیندوں پر 14 رنز ناٹ آؤٹ اسکور کیے۔یو اے ای کی جانب سے حیدر علی نے 2 کھلاڑیوں کو آؤٹ کیااور سمرنجیت اور محمد فاروق نے1، 1 وکٹ اپنے نام کی۔

اتوار کو پاکستان اور افغانستان کے درمیان فائنل کھیلا جائے گا، یو اے ای نے ایونٹ میں اپنے چاروں میچز میں شکست کا سامنا کیا ہے۔

آج کے میچ میں افغان ٹیم کی قیادت ابراہیم زادران نے کی، راشد خان نے ٹیم کے فائنل میں پہنچنے کے بعد آج کے میچ میں آرام کا فیصلہ کیا تھا۔

افغان ٹیم کے دیگر کھلاڑیوں میں رحمان اللّٰہ گرباز، کریم جنت، عظمت اللّٰہ عمر زئی، نور احمد، گل بدین نبی، شراف الدین اشرف، محمد اسحاق، مجیب الرحمان، فرید احمد ملک اور عبداللّٰہ احمد زئی شامل تھے۔

یو اے ای کی فائنل الیون میں کپتان محمد وسیم، محمد زوہیب، آصف خان، علی شان شرافو، راہول چوپڑا، ہرشیت کوشک، حیدر علی، محمد فاروق، محمد روہید، جنید صدیقی اور سمرنجیت سنگھ شامل تھے۔