پاکستان بھارت کے ساتھ مسئلہ کشمیر سمیت جامع مذاکرات کے لیے تیار ہے، اسحاق ڈار

فوٹو : فائل

اسلام آباد :نائب وزیراعظم و وزیر خارجہ اسحاق ڈار نے کہا ہے کہ پاکستان بھارت کے ساتھ تعلقات کی بحالی صرف مسئلہ کشمیر سمیت تمام تصفیہ طلب امور پر جامع مذاکرات کے ذریعے ہی ممکن ہے۔

پاک بھارت تعلقات اور جنگ بندی

میڈیا نمائندوں سے گفتگو میں اسحاق ڈار نے کہا کہ پاک بھارت جنگ بندی پر عمل جاری ہے۔ ان کا کہنا تھا کہ "جنگ بندی کے لیے بھارت نے امریکا سے درخواست کی تھی اور مجھے امریکا سے فون آیا تھا، میں نے واضح کیا کہ پاکستان نے کبھی جنگ چاہی ہی نہیں تھی۔”

انہوں نے کہا کہ پاکستان نے کبھی کسی تیسرے ملک سے بھارت کے ساتھ بٹھانے کی درخواست نہیں کی۔ تاہم، اگر کسی نیوٹرل مقام پر ملاقات کی تجویز ہو تو پاکستان تیار ہے۔ انہوں نے دوٹوک کہا کہ "بھارت کے ساتھ کسی ایک نکاتی ایجنڈے پر بات نہیں ہوگی، مذاکرات صرف مسئلہ کشمیر سمیت تمام معاملات پر ہوں گے۔”

بھارت کی بیان بازی اور امریکا کا مؤقف

اسحاق ڈار نے کہا کہ بھارت کی جانب سے بلاوجہ بیان بازی کا سلسلہ جاری ہے۔ انہوں نے بتایا کہ امریکا کے وزیر خارجہ کا پاکستان کا دورہ اس وقت شیڈول نہیں ہے۔

ڈار کا بنگلادیش کا دورہ

نائب وزیراعظم نے مزید بتایا کہ وہ جلد دو روزہ دورے پر بنگلادیش روانہ ہوں گے۔ اس دورے کا مقصد پاکستان اور بنگلا دیش کے درمیان تعلقات کو مزید مضبوط اور قریب لانا ہے۔

پاکستان بھارت کے ساتھ مسئلہ کشمیر سمیت جامع مذاکرات کے لیے تیار ہے، اسحاق ڈار