عمران خان آزادی کی جنگ لڑ رہے ہیں، 9 مئی پر انکوائری کمیشن بنایا جائے،جاوید ہاشمی

فوٹو: فائل

راولپنڈی : سینیئر سیاست دان جاوید ہاشمی نے کہا ہے کہ انہوں نے اپنی زندگی کا بڑا حصہ جیلوں میں گزارا لیکن جس طرح بانی پی ٹی آئی عمران خان نے اڈیالہ جیل میں وقت گزارا ہے، اس کا تصور بھی نہیں کیا جا سکتا تھا۔

راولپنڈی اڈیالہ روڈ داہگل ناکے پر صحافیوں سے گفتگو میں ان کا کہنا تھا کہ بانی پی ٹی آئی آزاد ہیں اور وہ ملک میں عوام کی آزادی کی جنگ لڑ رہے ہیں۔ ان کے مطابق آج جو پابندیاں لگائی جا رہی ہیں وہ صرف بادشاہت کے دور میں دیکھنے کو ملتی تھیں۔

جاوید ہاشمی نے کہا کہ ملک میں سیاست کو ختم کرنے کی بھرپور کوشش ہو رہی ہے اور جو لوگ آئین اور جمہوریت کی جنگ لڑ رہے ہیں وہ دراصل جہاد کر رہے ہیں۔ انہوں نے کہا کہ ملک میں کچھ نہ کچھ آئین، قانون اور سیاست کو باقی رہنا چاہیے جبکہ عدلیہ کی آزادی پہلے ہی سلب ہو چکی ہے۔

انہوں نے یاد دلایا کہ ماضی میں عمران خان کو گارنٹی دی گئی تھی کہ چار حلقے کھولے جائیں گے جس کے بعد انتخابات ہوں گے، مگر اس وعدے پر عمل نہیں ہوا۔ ان کا کہنا تھا کہ انہوں نے اس وقت بھی بانی پی ٹی آئی کو سمجھایا تھا کہ اسمبلی پر چڑھائی درست فیصلہ نہیں ہوگا۔

جاوید ہاشمی نے مزید کہا کہ آج عمران خان کو ان کی بات سمجھ آ رہی ہے، اسی لیے وہ یہ اعلان کر رہے ہیں کہ آخری سانس تک جدوجہد جاری رکھیں گے۔ ان کے مطابق 9 مئی کے واقعات عمران خان نے نہیں کیے، اس پر انکوائری کمیشن قائم ہونا چاہیے تاکہ حقائق سامنے آ سکیں۔

عمران خان آزادی کی جنگ لڑ رہے ہیں، 9 مئی پر انکوائری کمیشن بنایا جائے،جاوید ہاشمی