آسٹریلیا نے سنسنی خیز مقابلے میں جنوبی افریقا کو 2 وکٹوں سے ہراکر سیریزجیت لی

فوٹو : فائل

کیرنز: آسٹریلیا نے جنوبی افریقا کو تیسرے اور فیصلہ کن ٹی 20 میچ میں سنسنی خیز مقابلے کے بعد 2 وکٹوں سے شکست دے کر سیریز 1-2 سے جیت لی۔

ہفتہ کو کھیلے گئے میچ میں جنوبی افریقا نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 172 رنز اسکور کیے۔ ڈیوالڈ بریوس نے 53 رنز کی شاندار نصف سنچری بنائی، جب کہ رسی وین ڈیر ڈسن نے 38 رنز جوڑے۔ آسٹریلیا کی جانب سے ناتھن ایلس نے 3 وکٹیں جبکہ ایڈم زمپا اور جوش ہیزل ووڈ نے 2، 2 کھلاڑیوں کو پویلین بھیجا۔

ہدف کے تعاقب میں آسٹریلیا نے ایک گیند قبل 8 وکٹوں کے نقصان پر مطلوبہ اسکور حاصل کیا۔ کپتان مچل مارش نے 54 رنز کی ذمہ دارانہ اننگز کھیلی جبکہ گلین میکسویل نے 36 گیندوں پر 62 رنز کی دھواں دھار اننگز کھیل کر ٹیم کو کامیابی دلائی۔

جنوبی افریقا کی جانب سے کوربن بوش نے 3 وکٹیں حاصل کیں، جب کہ کاگیسو ربادا اور کیوینا مپاخا نے 2، 2 کھلاڑیوں کو آؤٹ کیا۔

خیال رہے کہ سیریز کے پہلے میچ میں آسٹریلیا نے 17 رنز سے کامیابی حاصل کی تھی جبکہ دوسرا میچ جنوبی افریقا نے 53 رنز سے جیتا تھا۔

آسٹریلیا نے سنسنی خیز مقابلے میں جنوبی افریقا کو 2 وکٹوں سے ہراکر سیریزجیت لی