معرکہ حق کے ہیروز کو اعزازات، فیلڈ مارشل عاصم منیر اور ائیر چیف ظہیر بابر کو ہلالِ جرات سے نوازا گیا

فوٹو : سوشل میڈیا

اسلام آباد : بھارت کے خلاف "معرکہ حق” میں شاندار کامیابی پر ایوانِ صدر میں منعقدہ پروقار تقریب میں صدر مملکت آصف علی زرداری نے سول و عسکری شخصیات کو اعلیٰ ترین اعزازات سے نوازا۔

صدر مملکت کی جانب سے وزیر خارجہ اسحاق ڈار، پارلیمانی کمیٹی کے سربراہ بلاول بھٹو زرداری، وزیر قانون اعظم نذیر تارڑ، وزیر دفاع خواجہ آصف اور وزیراعظم کے مشیر رانا ثنا اللہ کو نشانِ امتیاز عطا کیا گیا۔ وزیر اطلاعات عطا اللہ تارڑ، وزیر داخلہ محسن نقوی، احسن اقبال، شیری رحمان، فیصل سبزواری، مصدق ملک، حنا ربانی کھر، طارق فاطمی اور خرم دستگیر خان بھی سول ایوارڈز کے حقدار قرار پائے۔

پاک فوج کی شاندار جنگی حکمت عملی اور قیادت کے اعتراف میں فیلڈ مارشل اور آرمی چیف عاصم منیر کو ہلالِ جرات سے نوازا گیا، جب کہ فضائی جنگ میں تاریخی کامیابی پر چیف آف ائیر اسٹاف ائیر مارشل ظہیر احمد بابر سدھو کو بھی ہلالِ جرات ملا۔

بحری سرحدوں کی حفاظت پر نیول چیف ایڈمرل نوید اشرف اور چیئرمین جوائنٹ چیفس آف اسٹاف کمیٹی جنرل ساحر شمشاد مرزا کو نشانِ امتیاز دیا گیا۔
ڈی جی آئی ایس آئی لیفٹیننٹ جنرل عاصم ملک کو ستارہ بسالت، جبکہ ڈی جی ملٹری آپریشنز میجر جنرل کاشف عبداللہ، ائیر وائس مارشل محمد اورنگزیب اور رئیر ایڈمرل شہزاد حامد کو تمغہ بسالت سے نوازا گیا۔

یہ تقریب پاکستان کی عسکری و سیاسی قیادت کی معرکہ حق میں شجاعت، حکمت عملی اور قومی خدمت کے اعتراف کے طور پر یادگار بن گئی۔

معرکہ حق کے ہیروز کو اعزازات، فیلڈ مارشل عاصم منیر اور ائیر چیف ظہیر بابر کو ہلالِ جرات سے نوازا گیا