بجلی بلز کے سلیب پر کہیں نہ کہیں ایک یونٹ کا اثر تو آئے گا، وفاقی وزیر توانائی اویس لغاری

فوٹو : فائل

اسلام آباد : وزیراعظم شہباز شریف کی طرف سے بجلی بلز کے سلیبز خاص کر 201 یونٹس سے اوپر ایک یونٹ بڑھنے پر نظرثانی کا عندیہ عندیہ ہی رہا جب کہ وفاقی وزیر توانائی اویس لغاری نے قومی اسمبلی پھر پرانی کہانی بیان کر دی.

انھوں نے کہا کہ بجلی بلز کے سلیب پر کہیں نہ کہیں ایک یونٹ کا اثر تو آئے گا، وفاقی وزیر توانائی اویس لغاری کا کہنا تھا کہ 100 سے 200 یونٹ پر تقریباً 70 فیصد سبسڈی دی جا رہی ہے.

اویس لغاری نے ملک میں جاری گرمی کی شدید لہر کا احساس کئے بغیر ایوان کو بتایا کہ 200 سے کم یونٹ والے صارف تقریباً 60 سے 70 لاکھ ہوتے تھے، ان صارفین کی تعداد بڑھ کر تقریباً 1 کروڑ 83 لاکھ ہوگئی ہے۔

حالانکہ سچ یہ ہے کہ گرمیوں کے تین مہینوں میں بجلی کا استعمال بڑھ جاتا ہے اور 200 یونٹس کے اندر رہنا ممکن ہی نہیں ہے اور ایک یونٹ اوپر جانے سے بل تقریباً دو گنا ہو جاتا ہے اسی حکومتی ظالمانہ فیصلہ پر عوام چیخ رہے ہیں.

اویس لغاری نے وزیراعظم کی طرف سے پروٹکیٹڈ صارفین کی حد 300 کرنے اور ایک یونٹ کم کرنے عندیہ کے برعکس بتایا کہ کہی ناں کہیں ایک یونٹ کا فرق تو رہے گا، ساتھ ہی انکشاف کیا ہے کہ ملک میں تقریباً 7 ہزار میگا واٹ اضافی بجلی دستیاب ہے۔

بجلی کی اتنی وافر مقدار کے باوجود حکومت بجلی یونٹ کا فرق ختم کرنے پر آمادہ نہیں ہے، قومی اسمبلی میں پوچھے گئے سوالات کے جواب میں اویس لغاری نے کہا کہ کرپٹو کے لیے بجلی کا ابھی تک کوئی ریٹ آفر نہیں کیا گیا ہے۔

انہوں نے کہا کہ ملک میں تقریباً 7 ہزار میگا واٹ اضافی بجلی دستیاب ہےجبکہ نیشنل گرڈ پر تقریباً ساڑھے 3 کروڑ صارفین ہیں۔ تقریباً 1 کروڑ 85 لاکھ صارفین کو صفر سے 100 یونٹ پر تقریباً 90 فیصد سبسڈی دی جا رہی ہے۔

وفاقی وزیر نے کہا کہ پچھلے 9 ماہ میں بجلی کی قیمتوں میں کمی سے 200 یونٹ سے کم صارفین کےلیے بجلی مزید 60 فیصد سستی کی، پروٹیکٹڈ صارفین کے ٹیرف میں تقریباً 58 فیصد کمی کی گئی۔

انہوں نے کہا کہ جون 2024 ءمیں انڈسٹری سے 255 ارب روپے کی کراس سبسڈی لی جاتی تھی،کراس سبسڈی کا حجم 255 ارب سے کم ہو کر 94 ارب رہ گیا ہے۔

اویس لغاری نے یہ بھی کہا کہ ٹیکس سمیت بجلی کا ٹیرف 48 اعشاریہ7 سے کم کر کے 38 اعشاریہ 4 کیا ہے، نان پروٹیکٹڈ صارفین کے ریٹ میں بھی سلیب کے مطابق 11 سے 17 فیصد تک کی کمی کی۔

اُن کا کہنا تھا کہ ہم نے کراس سبسڈی کا بوجھ کم کیا اور بجلی کی مجموعی قیمت میں بھی کمی کی ہے، کراس سبسڈی کا بوجھ گھریلو صارفین پر بھی نہیں پڑنے دیا۔