فوٹو : سکرین شاٹ
کراچی : کراچی کے علاقے فیڈرل بی ایریا راشد منہاس روڈ پر پیش آنے والے افسوسناک ٹریفک حادثے میں ڈمپر کی ٹکر سے موٹر سائیکل سوار بہن بھائی جاں بحق ہوگئے۔
ریسکیو ذرائع کے مطابق حادثے میں والد سمیت تینوں افراد زخمی ہوئے، تاہم اسپتال منتقلی کے دوران 22 سالہ ماہ نور اور 14 سالہ علی رضا دم توڑ گئے، جبکہ والد کی حالت تشویشناک ہے۔
حادثے کے بعد شہری مشتعل ہوگئے اور 7 ڈمپروں کو آگ لگا دی۔ مشتعل ہجوم نے ڈمپر ڈرائیور کو تشدد کے بعد پولیس کے حوالے کر دیا۔ واقعے کے بعد راشد منہاس روڈ کو ٹریفک کے لیے بند کر دیا گیا، جبکہ پولیس نے ڈمپر جلانے کے الزام میں 10 افراد کو گرفتار کر لیا۔
ڈرائیورز کا ڈمپر جلانے پر احتجاج
ڈمپر جلانے کے خلاف ڈمپر ڈرائیور ایسوسی ایشن نے سپر ہائی وے سہراب گوٹھ پر احتجاج کرتے ہوئے سڑک ٹریفک کے لیے بند کر دی، جس کے باعث ٹریفک کی روانی شدید متاثر ہوئی۔
ایسوسی ایشن کے صدر حاجی لیاقت محسود نے دعویٰ کیا کہ حادثہ ٹینکر کی ٹکر سے ہوا اور مشتعل افراد نے غلط فہمی میں ڈمپر جلا دیے۔ انہوں نے 7 ڈمپرز کے نقصان کی ذمہ داری سندھ حکومت پر عائد کی اور نیشنل ہائی وے بھی بلاک کرنے کا اعلان کیا۔
دوسری طرف گورنر سندھ کامران ٹیسوری نے حادثے پر گہرے دکھ کا اظہار کرتے ہوئے کہا کہ ذمہ دار ڈرائیور کو قرار واقعی سزا دی جائے۔ انہوں نے شہریوں سے اپیل کی کہ وہ قانون ہاتھ میں لینے سے گریز کریں۔
کراچی میں ڈمپر حادثہ، بہن بھائی جاں بحق، مشتعل شہریوں نے 7 ڈمپر جلا دیے
Comments are closed.