پاکستان نے پہلا ونڈے میچ 5وکٹوں سے جیتا ،دوسرامیچ آج کھیلا جائے گا

فوٹو: سوشل میڈیا

ٹرینیڈاڈ: پاکستان نے پہلا ونڈے میچ 5وکٹوں سے جیتا ،دوسرامیچ آج کھیلا جائے گا،پاکستان نے ویسٹ انڈیز کے خلاف تین ایک روزہ میچوں کی سیریز کے پہلے ون ڈے میں شاندار کارکردگی کا مظاہرہ کرتے ہوئے 5 وکٹوں سے کامیابی حاصل کی۔۔

ٹرینیڈاڈ میں کھیلے گئے میچ میں میزبان ویسٹ انڈیز نے پہلے بیٹنگ کرتے ہوئے 49 اوورز میں 280 رنز بنائے۔ ایون لوئس 60، کپتان شائے ہوپ 55 اور روسٹن چیز 53 رنز کے ساتھ نمایاں رہے۔ دیگر بیٹرز میں رتھرفورڈ 10، گڈاکیش موتی 31، شیمار جوزف 8 اور شیفرڈ 4 رنز بنا سکے۔

پاکستان کی جانب سے شاہین شاہ آفریدی نے شاندار بولنگ کرتے ہوئے 4 وکٹیں حاصل کیں، نسیم شاہ نے 3 جبکہ صائم ایوب، سفیان مقیم اور سلمان آغا نے ایک ایک وکٹ لی۔

ہدف کے تعاقب میں پاکستان نے اعتماد کے ساتھ بیٹنگ کرتے ہوئے 281 رنز کا ہدف 49ویں اوور میں 5 وکٹوں کے نقصان پر حاصل کرلیا۔ ڈیبیو میچ کھیلنے والے حسن نواز نے شاندار پرفارمنس دیتے ہوئے 63 رنز اسکور کیے جبکہ حسین طلعت 41 رنز بنا کر ناٹ آؤٹ رہے۔

میچ سے قبل ٹیم مینیجر نوید اکرم چیمہ نے حسن نواز کو ون ڈے ڈیبیو کیپ دی، جس پر ساتھی کھلاڑیوں اور سپورٹ اسٹاف نے انہیں مبارکباد دی۔

پاکستان کی ابتدائی الیون میں عبداللہ شفیق، صائم ایوب، بابر اعظم، محمد رضوان، سلمان آغا، حسن نواز، حسین طلعت، فہیم اشرف، شاہین آفریدی، نسیم شاہ اور سفیان مقیم شامل تھے۔

پاکستان تین میچز کی سیریز میں ایک صفر کی برتری حاصل کر چکا ہے۔ آج کا دوسرا میچ جیت کر گرین شرٹس کو سیریز اپنے نام کرنے کا موقع ملے گا اور امکان ہے کہ ٹیم انتظامیہ وہی پلیئنگ الیون برقرار رکھے گی۔