ویسٹ انڈیز نے دوسرےٹی ٹوئنٹی میچ میں پاکستان کو 2 وکٹ سے شکست دے دی

فوٹو : کرک انفو

لاؤڈرہل : ویسٹ انڈیز نے دوسرےٹی ٹوئنٹی میچ میں پاکستان کو 2 وکٹ سے شکست دے دی جس کے بعد 3 میچز کی سیریز 1-1 سے برابر ہوگئی ہے، حسن علی مہنگے ترین باولر ثابت ہوئے۔

دوسرے ٹی ٹوئنٹی میچ میں پاکستان نے ویسٹ انڈیز کو جیت کے لیے 134 رنز کا ہدف دیا تھا جیسن ہولڈر نے آخری بال پر شاہین شاہ آفریدی کو چوکا مار کر میچ اپنے نام کر لیا۔

امریکی ریاست فلوریڈا کے شہر لاؤڈرہل میں کھیلے جارہے دوسرے میچ میں پاکستان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 9 وکٹوں کے نقصان پر 133 رنز بنائے۔

پاکستان کی جانب سے حسن نواز 40 رنز بناکر نمایاں رہے، کپتان سلمان آغا نے 38 اور فخر زمان نے 20 رنز کی اننگ کھیلی۔

قومی ٹیم کے دیگر بیٹر کوئی خاطر خواہ کارکردگی نہیں دکھا سکے، صائم ایوب 7، صاحبزادہ فرحان 3، محمد حارث 4، حسن علی 8 اور محمد نواز 2 رنز بناکر آؤٹ ہوئے۔

شاہین شاہ آفریدی 2 اور سفیان مقیم نے 1 رن اسکور کیا جبکہ فہیم اشرف بغیر کسی رن کے آؤٹ ہوئے۔ویسٹ انڈیز کی جانب سے جیسن ہولڈر نے 4 اوورز میں 19 رنز دے کر 4 وکٹ حاصل کیے۔

پاکستان ٹیم میں حارث رؤف کی جگہ حسن علی کو شامل کیا گیا تھا جبکہ ویسٹ انڈیز کی ٹیم میں بھی دو تبدیلیاں کی گئی تھیں۔

واضح رہے کہ پہلے ٹی ٹوئنٹی میچ میں پاکستان نے ویسٹ انڈیز کو 14 رنز سے شکست دی تھی۔