قومی اسمبلی اجلاس ، بھارت نے کوئی مس ایڈونچر کیا تو پاکستان سخت ترین جواب دے گا، پورا ایوان ایک زبان ہوگیا

فائل:فوٹو
اسلام آباد: قومی اسمبلی کے اجلاس میں بھارتی جارحیت کا منہ توڑ جواب دینے کے لیے پورا ایوان ایک زبان ہوگیا۔اراکین پارلیمنٹ نے کہا کہ بھارت نے کوئی مس ایڈونچر کیا تو پاکستان سخت ترین جواب دے گا۔

سپیکر سردار ایاز صادق کی صدارت میں قومی اسمبلی کا اجلاس ہوا جس میں اظہار خیال کرتے ہوئے پی ٹی آئی رہنما بیرسٹر گوہر نے کہا ہے کہ بھارت اور پاکستان دونوں ہمسایے ہیں، بار بار جنگ کی بات نہ کریں۔
انہوں نے کہا کہ پاکستان میں کئی جنگیں ہوئیں لیکن انڈس واٹر ٹریٹی کے خلاف کچھ نہیں ہوا، اس دفعہ پہلی بار مودی نے معاہدہ ختم کیا، پاکستان اس معاملے کو عالمی عدالت انصاف میں لے جائے، بھارت نے کوئی مس ایڈونچر کیا تو پاکستان سخت ترین جواب دے گا۔
بیرسٹر گوہر کا کہنا تھا کہ بانی پی ٹی آئی نے کہا تھا پاکستان سوچے گا نہیں جواب دے گا، مودی کے انڈیا اور عام سیکولر انڈیا میں فرق ہے، مودی کا انڈیا مسلمانوں اور دیگر اقلیتوں کے قتل عام پر خوش ہے، بھارت کو پتا ہونا چاہئے کہ یہ غزہ طرز کی جنگ نہیں ہو گی، پاک بھارت جنگ ہوئی تو بہت آگے تک جائے گی۔
پی ٹی آئی کے رکن اسمبلی کا کہنا تھا کہ بھارت پاکستان کا پانی کسی صورت نہیں روک سکے گا، مودی کے الزامات کو ہم مسترد کرتے ہیں، دہشتگردی ہماری طرف بھی ہے، بھارت نے جعفر ٹرین حملے کی مذمت تک نہیں کی جبکہ ہم نے پلواما سے لے کر پہلگام تک ہر واقعے کی مذمت کی۔
پاکستان پیپلزپارٹی کے چیئرمین بلاول بھٹو زرداری نے کہا ہے کہ سندھ طاس معاہدے کی معطلی انسانیت کیخلاف جرم ہے، پاکستان دہشت گردی برآمد نہیں کررہا بلکہ خود دہشت گردی کا شکار ہے، بھارتی حکومت غیرذمہ داری کا مظاہرہ کررہی ہے، پاکستانی قوم نے ڈر کر جینا نہیں سیکھا۔
قومی اسمبلی میں پہلگام فالس فلیگ آپریشن کے بعد بھارتی جارحیت کے حوالے سے اظہار خیال کرتے ہوئے بلاول بھٹو زرداری نے کہا کہ بھارت پاکستان کواپنی نااہلی کاذمہ دار ٹھہرانے کی کوشش کررہا ہے۔
پیپلز پارٹی کی رکن قومی اسمبلی سحر کامران کا کہنا تھا کہ آج شہید ذوالفقار علی بھٹو یاد آرہے ہیں جنہوں نے جان دے کر ایٹم بم بنایا، آج بھارت ایٹم بم کی وجہ سے پاکستان کی طرف نہیں بڑھ پا رہا، آج پاکستان کی ایٹمی و میزائل ٹیکنالوجی کے سائنس دانوں کو بھی سلام پیش کرتے ہیں، ہم پاکستان کے لیے جان دینے کو تیار ہیں۔
ایم کیو ایم کے رکن اسمبلی فاروق ستار نے اپنے خطاب میں کہا کہ مودی کا بیانیہ زمیں بوس ہورہا ہے، دنیا اب جاگ رہی ہے، مودی جیسا مائنڈ سیٹ ہی تھا جس نے پاکستان بننے کی راہ ہموار کی، بھارت کا اپنا انٹیلی جنس نظام ناکام ہے، اب تک کوئی سراغ، کوئی ثبوت نہیں مل سکا، صرف پاکستان فوبیا ہے جو مودی کے سر پر سوار ہے۔
انہوں نے کہا کہ ہمارے بنگالی بھائیوں نے مودی کے آلہ کار کو اٹھا کر پھینک دیا، تمہارا اپنی ہی ایجنٹ کو پناہ دینا تمہاری سفارتی ناکامی ہے، سکھوں کو مارنے کی وجہ سے کینیڈا کی حکومت اور عوام کا احتجاج جاری ہے، تمہارے خواب ایک ایک کر کے چکنا چور ہو گئے ہیں، ہمارے ایک بیٹے نے تمہارے جہاز کو گراکر ابھینندن کو چائے پلا کر واپس بھیجا۔
فاروق ستار نے کہا کہ اگر شوق ہے تو آئیں پھر پاکستان کو آزمائیں، اس مرتبہ انڈین ایئر فورس کا پورا سکوارڈن اتاریں گے، اس دفعہ چائے کی پیالی کے بجائے ڈرم بھیجیں گے کیوں کہ مودی کا آبائی پیشہ بھی چائے کا تھا، اس دفعہ تمہیں تمہاری حیثیت یاد دلا دیں گے۔
انہوں نے مزید کہا کہ آج کا سب سے بڑا سچ تو یہ ہے کہ مودی بہت بڑی غلطی کر بیٹھا ہے، آج پوری دنیا بھارتی موٴقف کو غلط اور پاکستان کے موٴقف کو درست قرار دے رہی ہے، پوری دنیا امن اور بات چیت چاہتی ہے جبکہ بھارت جنگ چاہتا ہے، ہم جنگ نہیں چاہتے لیکن اگر بھارت جنگ چاہتا ہے تو پھر جنگ ہی سہی۔
فاروق ستار نے یہ بھی کہا ہے کہ پوری پاکستانی قوم مسلح افواج کے ساتھ ہے، بھارت غیر جانبدارانہ تحقیقات سے کیوں بھاگ رہا ہے؟ سندھ طاس معاہدہ معطل کر کے مودی عالمی قوانین کی خلاف ورزی کررہا ہے، بھارت نے عالمی برادری کے خلاف جنگ شروع کردی، تم نے اپنے سیکولرازم کے تابوت میں آخری کیل ٹھونک دی۔
اپوزیشن لیڈر عمر ایوب نے ایوان میں اظہار خیال کرتے ہوئے کہا کہ وزیر اعظم سمیت وزرا کی 22 سیٹیں خالی ہیں، یہ حکومت کی سنجیدگی ہے، پی پی پی کی قیادت موجود ہے، اپوزیشن موجود ہے مگر مسلم لیگ ن ایوان سے غائب ہے، حکومتی رویے سے لگتا ہے کہ حکومت سرنڈر کر چکی ہے، مسلم لیگ ن بھاگنا چاہ رہی ہے۔
اعجاز الحق نے ایوان سے خطاب کرتے ہوئے کہا ہے کہ جب بھی مشکل وقت آتا ہے قوم اختلافات بھلا کر متحد ہو جاتی ہے، جو بات عمر ایوب خان نے کی اس سے اتفاق کرتا ہوں، حکومت تھوڑی سی ایوان پر توجہ دے، وزرا ایوان میں آئیں، مودی کے مائنڈ سیٹ نے آج تک پاکستان کو تسلیم نہیں کیا، بھارتی وزیراعظم نے گجرات میں ہولوکاسٹ کیا، وقت آئے گا جب پاکستان بھارتی جارحیت کا منہ توڑ جواب دے گا۔
قومی اسمبلی میں تقریر کرتے ہوئے وفاقی وزیر عطا تارڑ نے کہا کہ پاکستان کے سیاستدانوں نے سینے پر گولیاں کھائی ہیں، افواج اور پولیس نے دہشت گردوں کا ڈٹ کر مقابلہ کیا۔
بھارت کی قوم مودی سرکاری کے خلاف ا?وازیں اٹھا رہی ہے، بھارتی قوم ا?ج مودی سے سوال کررہی ہے کہ سفارتکاری میں ناکامی کیوں ہوئی؟ ہم نے پہلگام واقعہ پر ٹھیک وقت پر پتا کھیلا کہ تحقیقات کرالو، بھارت ا?ہستہ ا?ہستہ بند گلی میں جارہا ہے۔
انہوں نے تنبیہ کی کہ ہماری جانب بڑھے تو تمہاری نسلیں یاد رکھیں گی، پوری قوم افواج پاکستان کے پیچھے کھڑی ہے، کل ہمارا ایل اوسی کا دورہ پورے بھارت میں دکھایا گیا۔
ایوان سے خطاب میں شرمیلا فاروقی نے کہا کہ پہلگام واقعے سے سب کے دل لرزے، ہم وہ ملک ہیں جو دہشت گردوں کو چن چن کر مارتے ہیں۔
انڈیا نے اس واقعہ کو وجہ بنا لیا، بھارتی میڈیا نے پاکستان پر الزام لگانا شروع کردیے، اس کا طریقہ کار وہی پرانا ہے، انڈیا نے پانی بند کرنے کی بات کی حالانکہ اس ٹریٹی میں پانی بند کرنے کا ایسا کوئی طریقہ موجود نہیں ہے، پانی ایسی چیز ہے جس سے معیشیت بھی چلتی ہے، پانی ہماری ریڈ لائن ہے۔
گیارہ سال کی بچی اپنی ماں کو چھوڑ کر اکیلے پاکستان آئی، جو سکھ یاتری یہاں آئے ہوئے ہیں ان کو بھی جانے میں بھی مسائل ہیں، یہ تو کھلی دہشت گردی ہے، ہمیں اپنی مسلح افواج پر فخر ہے ، پاکستان سے بڑھ کر کچھ نہیں ہے، کوئی بھی شخصیت اہمیت نہیں رکھتی۔
پاکستان میں دہشت گردی ہمیشہ بھارت کرتا ہے، ہماری خواتین کی تعداد اس وقت بھی پارلیمنٹ میں موجود ہیں سوچیں جب یہ خواتین جنگ کیلئے نکلیں گی تو کیسے ہار ہو گی۔