چیمپئنز ٹرافی، جنوبی افریقہ کی افغانستان کیخلاف ٹاس جیت کر بیٹنگ جاری

فائل:فوٹو
کراچی: آئی سی سی چیمپئنز ٹرافی کے تیسرے میچ میں جنوبی افریقہ کی افغانستان کیخلاف ٹاس جیت کر بیٹنگ جاری ہے۔
دونوں ٹیموں کے درمیان میچ کراچی کے نیشنل بینک سٹیڈیم میں کھیلا جا رہا ہے جہاں پروٹیز کو ٹیمبا باووما لیڈ کر رہے ہیں جبکہ افغان ٹیم کی کمان حشمت اللہ شاہدی کے سپرد ہے، یہ چیمپئنز ٹرافی کے گروپ بی کا پہلا میچ ہے۔
ٹاس کے موقع پر افغانستان کے کپتان حشمت اللہ شاہدی کا کہنا تھا کہ اگر ہم ٹاس جیتتے تو باوٴلنگ ہی کرتے، ہم نے شارجہ میں جنوبی افریقہ کے خلاف معیاری کرکٹ کھیلی، ہمارے پاس بہترین سپنرز موجود ہیں۔
انہوں نے کہا کہ ہم جلدی وکٹیں لیکر اچھی شروعات کریں گے اور کوشش ہو گی کہ جنوبی افریقہ کو کم سکور تک محدود رکھیں۔
جنوبی افریقا کے کپتان ٹیمبا باووما نے اس موقع پر کہا ہے کہ عام طور پر پاکستان میں جیسی وکٹیں ہوتی ہیں یہ اس سے مختلف لگ رہی ہے، یقین سے نہیں کہہ سکتا کہ یہ کیسا برتاوٴ کرے گی، ہمیں وکٹ کا جائزہ لینا ہو گا، امید ہے کہ اچھا سکور بورڈ پر لگا سکیں گے۔
جنوبی افریقا کے کپتان نے مزید کہا ہے کہ ہمیں اپنی باوٴلنگ پر مکمل اعتماد ہے، ہماری مستقل مزاجی ہماری طاقت رہی ہے، ہم صرف ایک سپنر کے ساتھ کھیل رہے ہیں۔
جنوبی افریقی سکواڈ میں کپتان ٹیمبا باووما، ریان ریکلٹن، ٹونی ڈی زورزی، روسی وین ڈر ڈوسن، ایڈین مارکرم، ڈیوڈ ملر، ویان مولڈر، مارکو یانسن، کگیسو رباڈا، کیشو مہاراج اور لونگی نگیڈی شامل ہیں۔
افغان ٹیم میں کپتان حشمت اللہ شاہدی، رحمان اللہ گربار، ابراہیم زدران، صدیق اللہ اٹل، رحمت شاہ، عظمت اللہ عمرزئی، گلبدین نائب، محمد نبی، راشد خان، نور احمد اور فضل حق فاروقی شامل ہیں۔