پاکستان نے پہاڑ جیسا ہدف حاصل کر لیا، کپتان محمد رضوان اور سلمان علی آغا کی شاندار سنچریاں

فوٹو : سوشل میڈیا

کراچی : پاکستان میں کھیلی جانے والی سہ
فریقی سیریز کے تیسرے اور اہم میچ میں پاکستان نے ریکارڈ ہدف حاصل کرتے ہوئے جنوبی افریقہ کو 6 وکٹوں سے ہرا کر فائنل کےلیے بھی کوالیفائی کرلیا۔

جنوبی افریقہ کا 353 رنز کا ہدف پاکستان نے صرف 4 وکٹوں کے نقصان پر 49ویں اوور میں حاصل کرلیا۔ پاکستان نے پہاڑ جیسا ہدف حاصل کر لیا، کپتان محمد رضوان اور سلمان علی آغا کی شاندار سنچریاں فتح کا موجب بنیں۔
قومی ٹیم ہدف کے تعاقب میں91 رنز پر تین وکٹوں سے محروم ہوگئی۔ بابر اعظم 23، سعود شکیل 15 اور فخر زمان 41 رنز بنا کر آؤٹ ہوئے، اس کے بعد چوتھی وکٹ پر سلمان علی آغا اور محمد رضوان کے درمیان 260 رنز کی ریکارڈ ساز پارٹنرشپ بنی۔

سلمان علی آغا 103 گیندوں پر 134 رنز بنا کر آؤٹ ہوئے جبکہ کپتان محمد رضوان 122 رنز بنا کر ناٹ آؤٹ رہے، 49 اوور کی آخری بال پر طیب طاہر نے چوکا لگا کر فتح کا اعلان کیا.

یہ پہلا موقع ہے جب پاکستان ٹیم نے ون ڈے کرکٹ کی تاریخ میں 350 یا اس سے زائد کا ہدف عبور کیا ہے، جنوبی افریقہ کی جانب سے ویان ملڈر نے 2 جبکہ لنگی اینگیڈی اور کوربن بوش نے ایک، ایک وکٹ لی۔

اس سے قبل کراچی کے نیشنل بینک اسٹیڈیم میں کھیلے جانے والے اس میچ میں جنوبی افریقہ نے پاکستان کے خلاف ٹاس جیت کر بیٹنگ کا فیصلہ کیا۔

جنوبی افریقہ نے مقررہ 50 اوورز میں 352 رنز کا ٹوٹل بورڈ پر سجادیا۔ ہینرک کلاسین 87، میتھیو بریٹزکی 83 اور ٹیمبا باووما 82 رنز کی اننگز کھیل کر آؤٹ ہوئے۔

کائل ویریانے نے 32 گیندوں پر 44 رنز کی ناقابلِ شکست اننگز کھیل کر اپنی ٹیم کو ساڑھے تین سو کے ہندسے کے پار پہنچایا،انکے علاوہ ٹونی ڈی زورزی نے 22 اور کوربن بوش نے 15 رنز بنائے۔

پاکستان کی جانب سے شاہین آفریدی دو جبکہ نسیم شاہ اور خوشدل شاہ ایک ایک وکٹ لینے میں کامیاب ہوئے،جنوبی افریقا کے خلاف اہم میچ کےلیے پاکستان کی فائنل الیون میں 2 تبدیلیاں کی گئی تھیں۔

پاکستان ٹیم میں کامران غلام کی جگہ سعود شکیل کو جبکہ حارث رؤف کی جگہ پر محمد حسنین کو ٹیم کو شامل کیا گیا، قومی ٹیم کپتان محمد رضوان، فخر زمان، بابر اعظم، سعود شکیل، سلمان علی آغا، طیب طاہر، خوشدل شاہ، شاہین آفریدی، محمد حسنین، نسیم شاہ اور ابرار احمد پر مشتمل تھی۔

پاکستان اور نیوزی لینڈ کے درمیان سہ فریقی سیریز کا فائنل 14 فروری کو کراچی کے نیشنل اسٹیڈیم میں کھیلا جائے گا، نیوزی لینڈ نے پاکستان اور جنوبی افریقہ دونوں کو ہی گروپ میچز میں شکست دے کر فائنل کے لیے کوالیفائی کیا ہوا ہے.