پاکستان نے بھارت کو ہانگ کانگ سپر سکسز میں شکست دے دی

فوٹو:فائل

مونگ کوک : پاکستان نے بھارت کو ہانگ کانگ سپر سکسز میں شکست دے دی، پاکستان نے بھارت کو آؤٹ کلاس کر دیا۔پاکستان نے بھارت کی جانب سے دیا گیا 120 رنز کا ہدف بغیر کوئی وکٹ گنوائے حاصل کرلیا.

مونگ کوک میں کھیلے گئے ہانگ کانگ سپر سکسز کے گروپ مقابلے میں پاکستان نے ٹاس جیت کر پہلے فیلڈنگ کا فیصلہ کیا، بھارت نے مقررہ 6 اوورز میں 2 وکٹوں کے نقصان پر 119 رنز بنائے۔

قومی ٹیم نے 120 رنز کا ہدف بغیر کسی نقصان کے صرف 5 اوورز میں ہی حاصل کر لیا، جارح مزاج بیٹر آصف علی نے 14 گیندوں پر 55 رنز کی برق رفتار اننگز کھیلی اور ریٹائرڈ ہرٹ ہوئے۔

پاکستان کی جانب سے محمد اخلاق نے 40 اور کپتان فہیم اشرف نے 5 گیندوں پر 22 رنز بنا کر ٹیم کو کامیابی سے ہمکنار کروایا، بھارت کا کوئی بھی باؤلر پاکستان کی ایک وکٹ بھی حاصل نہ کر سکا۔

اس سے قبل بھارت کی جانب سے کپتان روبن اتھاپا 31، کیدار جادھو 8 رنز بنا سکے، بھرت چپلی 53 رنز کی اننگز کھیل کر ریٹائرڈ ہرٹ ہوئے جبکہ منوج تیواری 17 رنز بنا کر ناٹ آؤٹ رہے، پاکستان کی جانب سے کپتان فہیم اشرف نے 2 وکٹیں حاصل کیں۔

اس فتح کے ساتھ پاکستان نے ہانگ کانگ سُپر سکسز کے کوارٹر فائنل میں جگہ بنا لی ہے۔اس سے قبل ہانگ کانگ سُپر 6 میں پاکستان نے فاتحانہ آغاز کرتے ہوئے میچ میں یو اے ای کو 13 رنز سے ہرایا تھا۔