پاکستان مسئلہ فلسطین کا اقوام متحدہ کی قراردادوں کے مطابق حل چاہتا ہے،دفتر خارجہ

فائل:فوٹو

اسلام آباد: دفتر خارجہ کا کہنا ہے کہ پاکستان مسئلہ فلسطین کا اقوام متحدہ کی قراردادوں کے مطابق حل چاہتا ہے اور غزہ میں فوری جنگ بندی کا مطالبہ کرتا ہے۔

ترجمان دفتر خارجہ ممتاز زہرا بلوچ نے ہفتہ وار نیوز بریفنگ میں کہا کہ وزیراعظم شہبازشریف چین کے دورے پر ہیں، وزیراعظم کے ہمراہ اعلیٰ سطح کا وفد بھی ہے، چین اور پاکستان کے درمیان اعلیٰ سطح کی ملاقاتیں ہوئیں جن میں عالمی و علاقائی امور پر تفصیلی تبادلہ خیال کیا گیا۔

ان کا کہنا تھا کہ وزیراعظم شہبازشریف کی چین کے مختلف سرمایہ کاروں سے ملاقات ہوئی، وزیراعظم نے شینزن میں چینی کمپنیوں کو پاکستان میں سرمایہ کاری کی دعوت دی، وزیراعظم نے شینزن کے دورے میں مختلف سرمایہ کاروں اور کمپنیوں سے ملاقات کی۔

ترجمان دفتر خارجہ نے کہا کہ پاکستان کو سلامتی کونسل میں مستقل رکنیت کیلئے 182 ارکان کی حمایت حاصل ہوگئی، پاکستان سلامتی کونسل میں اپنا بھرپور کردارادا کرے گا، پاکستان عالمی خوشحالی کیلئے اپنا کردارادا کرتا رہے گا۔

ممتاز زہرا بلوچ کا کہنا تھا کہ پاکستان فلسطین میں اسرائیلی فورسز کی جارحیت کی مذمت کرتا ہے، پاکستان مسئلہ فلسطین کا اقوام متحدہ کی قراردادوں کے مطابق حل چاہتا ہے اور غزہ میں فوری جنگ بندی کا مطالبہ کرتا ہے۔

انہوں نے کہا کہ مقبوضہ کشمیر میں گزشتہ دہائی میں 7 ہزار سے زائد افراد کو شہید کیا گیا، پاکستان مسئلہ کشمیر کے حل تک کشمیری عوام کی حمایت جاری رکھے گا۔

دفتر خارجہ کا مزید کہنا تھا کہ نائب وزیراعظم اور وزیر خارجہ اسحاق ڈار استنبول کا دورہ کریں گے اور غزہ کی صورتحال پر پاکستان کا موٴقف پیش کریں گے، ترکیہ میں نائب وزیراعظم اسحاق ڈار مختلف ممالک کے وزرائے خارجہ سے ملاقات بھی کریں گے۔