فائل:فوٹو
اسلام آباد: وزیراعلیٰ خیبرپختونخوا علی امین گنڈاپور نے گورنر خیبر پختونخوا فیصل کریم کنڈی کے ”خیبر پختونخوا ہاوٴس“اسلام آباد آنے پر پابندی لگادی ہے۔ ترجمان کے پی حکومت بیرسٹر سیف کاکہناہے کہ گورنر کے لیے کے پی ہاوٴس میں متبادل رہائشی بندوبست کیا جارہا ہے۔ گورنر فی الحال سندھ ہاوٴس میں قیام کا بندوست کریں اور دل نہ ہاریں۔
ذرائع کے مطابق وزیراعلیٰ پختونخوا علی امین گنڈاپور نے گورنر کی رہائش گاہ اپنی تحویل میں لے لی ہے، جس کے بعد وہاں سے گورنر کا سامان بھی نکال دیا گیا ہے۔ گورنر کے پی کے فیصل کریم کنڈی اب ”خیبر پختونخوا ہاوٴس“ میں اپنی انیکسی استعمال نہیں کر سکیں گے۔ اس حوالے سے وزیراعلیٰ خیبر پختونخوا علی امین گنڈاپور نے متعلقہ عملے کو بھی آگاہ کردیا ہے۔
دوسری جانب ترجمان پختونخوا حکومت بیرسٹر سیف نے کہا ہے کہ کے پی کے ہاوٴس میں گورنر کے لیے مختص بلاک ختم کردیا گیا ہے۔ یہ فیصلہ صوبائی کابینہ کے گزشتہ اجلاس میں کیا گیا تھا۔ خیبر پختون خوا کابینہ میں وزرا اور ارکان اسمبلی کے لیے رہائش کا مسئلہ درپیش تھا۔ گورنر انیکسی فی الحال ارکان صوبائی اسمبلی اور وزرا استعمال کریں گے۔
انہوں نے کہا کہ گورنر کے لیے کے پی ہاوٴس میں متبادل رہائشی بندوبست کیا جارہا ہے۔ گورنر فی الحال سندھ ہاوٴس میں قیام کا بندوست کریں اور دل نہ ہاریں، سندھ ہاوٴس میں پی ٹی آئی ایم پی اے کی طرح کے پی ہاوٴس میں ان کا داخلہ بند نہیں کریں گے۔گورنر کے اسلام آباد میں کئی گھر ہیں، ان کے لیے اسلام آباد میں رہائش کی کوئی کمی نہیں ہے۔
دوسری جانب گورنر پختونخوا فیصل کریم کنڈی نے میڈیا سے گفتگو کرتے ہوئے کہا کہ کے پی ہاوٴس میں گورنر کی انیکسی کو بند کرنا غیر آئینی ہے۔ میں گورنر ہاوٴس میں کسی وزیر اعلیٰ کی آمد پر پابندی نہیں لگاوٴں گا۔ سیاسی جنگیں سیاسی میدان میں لڑیں گے۔
خیال رہے کہ گورنر اور وزیراعلیٰ پختونخوا کے درمیان اختلافات اور لفظی جنگ ایک دوسرے کو دھمکیاں دینے کے بعد اب عملی اقدامات میں تبدیل ہو چکی ہے اور اسی سلسلے میں وزیراعلیٰ کے پی کے علی امین گنڈاپور نے گورنر خیبر پختونخوا فیصل کریم کنڈی کے ”خیبر پختونخوا ہاوٴس“اسلام آباد آنے پر پابندی لگادی ہے۔
Comments are closed.