پاکستان نے دوسرے ٹی ٹوئنٹی میں آئرلینڈ کو 7 وکٹوں سے شکست دیدی

فوٹو: سوشل میڈیا

ڈبلن : پاکستان نے دوسرے ٹی ٹوئنٹی میں آئرلینڈ کو 7 وکٹوں سے شکست دیدی، فخرزمان اور محمد رضوان کی سنچری شراکت نے ہدف حاصل کرنے میں مدد کی۔

پاکستان کی طرف سے 194 رنز ہدف کے تعاقب میں صائم ایوب 6 رنز اور کپتان بابراعظم بغیر کوئی رن بنائے پویلین لوٹ آئے ، فخر زمان نے 78 رنز کی شاندار اننگز کھیلی ۔

محمد رضوان جیت تک کریز پر جمے رہے اور 75 رنز بنا کر ناقابل شکست واپس آئے اور پلیئر آف دی میچ قرار پائے،جب کہ اعظم خان نے 30 رنز کی دھواں دھار اننگز کھیل کر میچ فنش کردیا۔

ڈبلن میں کھیلے گئے میچ میں پاکستان نے آئرلینڈ کے خلاف ٹاس جیت کر پہلے بولنگ کرنے کا فیصلہ کیا، آئرلینڈ کی ٹیم نے مقررہ 20 اوورز میں 7 وکٹوں کے نقصان پر 193 رنز بنائے۔

 شاہین شاہ آفریدی نے 4 اوور میں 49 رنز دے کر 3 وکٹیں حاصل کیں، عباس آفریدی نے 2  محمد عامر اور نسیم شاہ نے 1،1 وکٹ حاصل کی۔

قومی ٹیم میں محمد عامر کی واپسی ہوئی ہے، انہیں شاداب خان کی جگہ پر پلیئنگ الیون میں شامل کیا گیا ہے۔

پاکستان کی ٹیم کپتان بابر اعظم، صائم ایوب، محمد رضوان، فخر زمان، اعظم خان، افتخار احمد، عماد وسیم، شاہین آفریدی، نسیم شاہ، عباس آفریدی اور محمد عامر پر مشتمل ہے۔

آئرلینڈ کی ٹیم پال اسٹرلنگ کی قیادت میں میدان میں اتر ترہی ہے۔ دیگر کھلاڑیوں میں مارک اڈائر، اینڈریو بلبیرنی، کرٹس کیمفر، گاریتھ ڈیلانے، جارج ڈاکریل، گراہم ہیوم، ہیری ٹیکٹر، لورکان ٹرکر، بین وائٹ اور کریگ ینگ شامل ہیں۔

واضح رہے کہ آئرلینڈ نے 3 ٹی 20 میچوں کی سیریز کے پہلے میچ میں پاکستان کو 5 وکٹوں سے شکست دے دی تھی اب سیریز ایک ایک سے برابر ہے منگل کو کھیلے گے میچ میں فیصلہ ہوگا۔

 آئرلینڈ نے 183 رنز کا ہدف 5 وکٹ کے نقصان پر 1 گیند قبل حاصل کیا تھا۔ ٹی20 میچز میں یہ پاکستان کےخلاف آئرلینڈ کی پہلی کامیابی تھی۔