پاکستانی کھلاڑیوں کے قرنطینہ سے نکلتے ہی چہرے کھل اٹھے

فوٹو:پی سی بی

کرائسٹ چرچ: نیوزی لینڈ کے دورے پر موجود قومی ٹیم کے کھلاڑی قید تنہائی سے آزادی ملتے ہی خوش باش دکھائی دیئے، کچھ نے سیر کی ، اکٹھے سلفیاں لیں اور خوب انجوائے کیا۔

دو ہفتے کے صبر آزما انتظار کے بعد پاکستانی ٹیم کو مینجڈ آئسولیشن سے نکل کر ٹی20 اور ٹیسٹ سیریز کے لیے تیاری کرنے کی اجازت دے دی گئی۔14 روزہ آئسولیشن کے 12ویں دن اسکواڈ کے تمام اراکین کے ٹیسٹ منفی آئے۔

انہیں کوئنز لینڈ کے ساؤتھ آئیلینڈ ریزورٹ تک سفر کی اجازت دے دی گئی ہے جہاں وہ گروپ کی شکل میں ٹریننگ کریں گے۔

قومی ٹیم کو گروپ میں ٹریننگ کا استثنیٰ آئسولیشن کے تیسرے روز اس وقت واپس لے لیا گیا تھا جب کھلاڑیوں کی جانب سے کووڈ-19 پروٹوکولز کی خلاف ورزی کی گئی تھی اور انہیں ایک ساتھ کھانا کھاتے اور کوریڈورز میں ملتے ہوئے دیکھا گیا تھا۔

Pakistan and Shaheens squad reach Queenstown 🛬#HarHaalMainCricket #NZvPAK pic.twitter.com/OnwifLK2mi

— Pakistan Cricket (@TheRealPCB) December 8, 2020

قومی ٹیم کے نیوزی لینڈ پہنچتے ہی 6 اراکین کے ٹیسٹ مثبت آ گئے تھے جبکہ اگلے چند روز میں مزید دو اراکین کورونا کا شکار ہوئے جس کے بعد کھلاڑیوں کو قرنطینہ میں رہنے کی سختی سے ہدایت کی گئی تھی۔

نیوزی لینڈ کے محکمہ صحت کی جانب سے جاری بیان میں کہا گیا کہ مکمل صحت یاب ہونے تک ایک رکن کرائسٹ چرچ میں قرنطینہ میں ہی رہے گا، ایک فرد کا مستقل منفی ٹیسٹ آیا جس کے بعد اسے آکلینڈ کی قرنطینہ سہولت سے ریلیز کردیا گیا ہے۔

دبئی سے نیوزی لینڈ پہنچنے والے مذکورہ کھلاڑی میں وائرس کی علامات ظاہر ہوئی تھیں لیکن مستقل منفی ٹیسٹ آنے کے بعد انہیں بھی جانے کی اجازت دے دی گئی۔ صحت کے ماہرین مطمئن ہیں کہ ان کھلاڑیوں سے معاشرے کو نقصان پہنچنے کے امکانات انتہائی کم ہیں۔

نائب کپتان شاداب خان نے سماجی رابطوں کی ویب سائٹ ٹوئٹر پر ایک تصویر شیئر کی جس میں نوجوان کھلاڑیوں کو ایک ساتھ خوشگوار موڈ میں دیکھا جا سکتا ہے۔

Life and smiles after quarantine @iamzafargohar @HarisRauf14 @iMusaKhan @iFaheemAshraf @HussainTallat12 @RealImranButt @iamhaideraly pic.twitter.com/GDXMDZCOwn

— Shadab Khan (@76Shadabkhan) December 8, 2020

کھلاڑیوں کے مسلسل آئسولیشن میں رہنے سے پاکستان کرکٹ بورڈ کے حکام اور قومی ٹیم کے مینجمنٹ دونوں پریشان تھے اور قومی ٹیم کے ہیڈ کوچ مصباح الحق نے کہا تھا کہ کھلاڑیوں کو آئسولیشن میں ذہنی اور جسمانی طور پر نقصان ہو رہا ہے۔

ٹیم تین ٹی20 اور دو ٹیسٹ میچز کی سیریز کے لیے 23 نومبر کو نیوزی لینڈ روانہ ہوئی تھی،قومی ٹیم 18، 20 اور 22 دسمبر کو بالترتیب آکلینڈ، ہملٹن اور نیپیئر میں ٹی 20 میچز کھیلے گی ۔

میزبان ٹیم سے 2 ٹیسٹ میچز بھی شیڈول میں شامل ہیں سیریز کا پہلا ٹیسٹ میچ باکسنگ ڈے پر 26 دسمبر کو شروع ہو گا جبکہ کرائسٹ چرچ میں دوسرا ٹیسٹ میچ 3 جنوری سے کھیلا جائے گا۔