بلاول بھٹو کاامریکہ میں حکومتی کوششوں کی غیرمشروط حمایت کا اعلان

فائل فوٹو

اسلام آباد (زمینی حقائق )چیر مین پیپلز پارٹی بلاول بھٹو زرداری نے کہا ہے کہ انہیں اپنے وزیراعظم، ان کی غیر جمہوری سیاست اور مہلک معاشی پالیسیوں پر کئی تحفظات ہیں تاہم وہ عالمی سطح پر حکومتی کوششوں کی غیرمشروط حمایت کرتے ہیں۔

یاد رہےوزیراعظم عمران خان تین روز سے امریکا میں موجود ہیں جہاں نے انہوں نے گزشتہ امریکی صدر سے بھی ملاقات کی جس میں ڈونلڈ ٹرمپ نے کشمیر کے مسئلے پر پاکستان اور بھارت کے درمیان ثالثی اور پاکستان کے ساتھ تجارت کو وسعت دینے کی بات کی۔

وزیراعظم کے دورہ امریکا کے حوالے سے پاکستان پیپلز پارٹی کے چیئرمین بلاول بھٹو نے سماجی رابطے کی ویب سائٹ ٹوئٹر پر اپنے خیالات کا اظہار کیا اور عالمی سطح پر حکومتی اقدامات کی غیرمشروط حمایت کا اعلان کیا۔

بلاول بھٹو نے لکھا کہ "انہیں اپنے وزیر اعظم، ان کی غیر جمہوری سیاست اور مہلک معاشی پالیسیوں پر کئی تحفظات ہیں تاہم وہ یہ کہنا چاہیں گے کہ ملک کے وسیع قومی مفاد میں ہر کسی کو عالمی سطح پر پاکستان کی کوششوں کو سراہنا چاہیے ۔

انھوں نے کہا اسی لئے وہ اس سلسلے میں حکومتی اقدامات کی غیر مشروط طور پر حمایت کرتے ہیں۔”

انہوں نے مزید کہا کہ جب بھی ضرورت پڑی تو وہ مثبت تنقید کرتے رہیں گے لیکن ہمیشہ سب سے پہلے وہ پاکستان کی حمایت کریں گے۔