توہین الیکشن کمیشن کیس ، بانی پی ٹی آئی اور فواد چوہدری پر فرد جرم عائد

فائل:فوٹو

راولپنڈی: توہین الیکشن کمیشن کیس میں بانی تحریک انصاف اور سابق وفاقی وزیر فواد چو ہدری پر فرد جرم عائد کر دی گئی۔

بانی پاکستان تحریک انصاف اور فواد چوہدری کیخلاف توہین الیکشن کمیشن کیس کی سماعت اڈیالہ جیل میں ہوئی، الیکشن کمیشن کے چار رکنی بنچ نے کیس کی سماعت کی۔

بانی پی ٹی آئی اور فواد چوہدری کمرہ عدالت میں موجود تھے، فرد جرم کمرہ عدالت میں پڑھ کر سنائی گئی۔

ملزمان نے چارج شیٹ میں لگے الزامات سے انکار کر دیا، بعد ازاں الیکشن کمیشن نے کیس کی مزید سماعت 16 جنوری تک ملتوی کر دی۔

کیس کی سماعت کے بعد الیکشن کمیشن ممبران اڈیالہ جیل سے روانہ ہوگئے۔

خیال رہے کہ وزارتِ داخلہ نے بانی پی ٹی آئی کو الیکشن کمیشن میں پیش کرنے سے معذرت کی تھی اور وزارت قانون سے رائے لے کر اڈیالہ جیل میں بانی پی ٹی آئی اور فواد چوہدری کے ٹرائل کی درخواست کی تھی۔