بجلی مہنگی کرنے والے سابق حکمران اتحاد پی ڈی ایم کو بھی ہوش آگیا

فوٹو: فائل

سیالکوٹ:خواجہ آصف کا بجلی بلز پر ٹویٹ، جے یوآئی کی پشاور میں احتجاجی ریلی حکومت سے نکلنے کے بعد سابق وفاقی وزیر دفاع خواجہ آصف بھی بجلی کے بحران اور زائد بلز پر خاموش نہ رہ سکے۔

بجلی کی قیمتوں میں ظالمانہ اضافہ اور آنکھیں بندکرکے آئی ایم ایف کی شرائط ماننے والی اور بجلی مہنگی کرنے والے سابق حکمران اتحاد پی ڈی ایم کو بھی ہوش آگیا ہے۔

ملک بھر میں عوام کو سڑکوں پر دیکھتے ہوئے بجلی کی قیمت میں اضافہ کرنے والے حکمران اتحاد پی ڈی ایم کے سربراہ مولانا فضل الرحمان کی پارٹی نے بھی پشاور میں بجلی بلز کے خلاف ریلی نکالی ہے۔

دوسری طرف ٹوئٹر پر بیان میں مسلم لیگ ن کے سینئر رہنما اور سابق وزیردفاع خواجہ آصف کہتے ہیں ،صارفین کیلئے ریلیف کی حد 200 یونٹ سے بڑھا کر 300 یونٹ کر نی چاہیے۔

اپنی حکومت میں عالمی مالیاتی ادارے کے سامنے سرنڈر کرنے والی حکومت کے رہنما نےنگران حکومت کو مشورہ دیا ہے کہ آئی ایم ایف کو اپروچ کرنا چاہیے۔

بجلی کا بحران۔۔

ریلیف کی حد 200یو نٹ سے بڑھا کر 300یونٹ کر نی چاھئیے۔ اسکے لیئے IMF کو اپروچ کرنا چاھئیے
اسوقت یہ رعایت اگر سال میں کسی ایک ماہ میں 200تجاوز کر جاۓ تو سارے سال کی رعایت ختم ھو جاتی ھے-اس رعایت کو ماہانہ بنیادوں پہ مہیا ھونا چاہئیے

آزاد کشمیر فاٹا بلوچستان سے…

— Khawaja M. Asif (@KhawajaMAsif) August 27, 2023

خواجہ آصف جو اپنے کئے گئے معاہدہ کو سمجھتے ہیں نے وضاحت کرتے ہوئے کہا کہ ‏اس وقت یہ رعایت اگر سال میں کسی ایک ماہ میں 200 یونٹ سے تجاوز کر جائے تو سارے سال کی رعایت ختم ہو جاتی ہے۔

انہوں نے کہا کہ ‏آزاد کشمیر، فاٹا اور بلوچستان سے 200 ارب سے زائد بجلی کی قیمت ریکور نہیں ہوتی، سارے ملک میں 650 ارب سے زائد بجلی چوری ہوتی ہے۔

 بڑے شہروں، مارکیٹوں میں 70 سے 80 فیصد بجلی چوری ہوتی ہے، یہ بوجھ عام صارف پہ پڑتا ہے، ‏17 گریڈ سے اوپر تمام حکومتی اداروں میں مفت بجلی کی رعایت ختم ہونی چاہیے۔

خواجہ آصف نے کہا کہ اس وقت وفاقی حکومت 900 ارب سے زائد سبسڈی چوری، کم ادائیگی اور لائین لاسز کو کور کرنے کیلئے پاور سیکڑ کو ادا کرتی ہے، یہی رقم عام صارف کو سستی بجلی مہیا کرنے کیلئے استعمال ہو سکتی ہے۔