سپریم کورٹ کے ججز آمنے سامنے ہوں تو پارلیمنٹ کو کردار ادا کرنا چاہیے،رانا ثناء اللہ

فائل:فوٹو

 اسلام آباد: وفاقی وزیر داخلہ رانا ثنا اللہ نے کہا ہے کہ سپریم کورٹ کے پاس اخلاقی اتھارٹی ہے۔ جب سپریم کورٹ کے ججز آمنے سامنے ہوں اس وقت پارلیمنٹ کو اپنا کردار ادا کرنا چاہیے۔

 سپریم کورٹ کے باہر میڈیا سے گفتگو کرتے ہوئے وزیرداخلہ رانا ثنا اللہ نے کہا کہ عدالت سے انصاف اور ملک میں قانون کی حکمرانی کے لیے عدالت اعظمیٰ  کا کردار چاہتے ہیں۔

انہوں نے کہا کہ اس سے پہلے جو ناانصافیاں ہوئی لوگوں کو اس پر اعتراض ہے۔ ججز بھی کہہ رہے ہیں فیصلہ 4 تین سے تھا۔ یہ عدالت  کا اندرونی معاملہ نہیں ہے۔ آج بھی استدعا ہے سوموٹو کو فل کورٹ کی طرف لے جایا جائے۔

رانا ثنا اللہ نے کہا کہ یہ ملک کو مستقل افراتفری کے سپرد کرنے والی بات ہے۔ جب تک ہمت ہے اس چیز کو روکیں گے۔ جب میدان لگے گا سب کچھ سامنے آ جائے گا۔ کل پارلیمنٹ میں ایک بل  پیش ہوا ہے آج امید ہے منظور ہو جائے گا۔

وزیرداخلہ نے مزید کہا کہ اس بل کے تحت کوئی بابا رحمت یا بابا زحمت ثابت نہیں ہو گا۔ سپریم کورٹ آف پاکستان قوم کی رہنمائی کرے گی۔