بھارتی کپتان سوریا کمار یادیو ٹی20 ورلڈ کپ سے پہلے ایک نئے تنازعہ میں پھنس گئے

فوٹو : سوشل میڈیا

اسلام آباد : بھارتی کپتان سوریا کمار یادیو ٹی20 ورلڈ کپ سے پہلے ایک نئے تنازعہ میں پھنس گئے ، بھارتی اداکارہ نے بیچ چوراہے بھانڈا پھوڑا تو ٹی ٹوئنٹی ٹیم کے کپتان غصہ کرکے اور اداکارہ کے خلاف ہتک عزت کا دعوی دائر کردیا ہے۔

بھارتی میڈیا رپورٹس کے مطابق بھارتی ٹی 20 کرکٹ ٹیم کے کپتان سوریا کمار یادو نے بالی ووڈ اداکارہ خوشی مکھرجی کے خلاف ہتکِ عزت کا مقدمہ دائر کر دیا ہے۔

  یہ قانونی کارروائی خوشی مکھرجی کی جانب سے سوشل میڈیا اور میڈیا گفتگو میں کیے گئے ایک متنازع اور وائرل دعوے کے بعد سامنے آئی ہے، جسے سوریا کمار یادو نے جھوٹا اور اپنی ساکھ کو نقصان پہنچانے والا قرار دیا ہے۔

رپورٹس کے مطابق سوریا کمار یادو نے اداکارہ خوشی مکھرجی کے خلاف 100 کروڑ بھارتی روپے ہرجانے کا مطالبہ کیا ہے۔ ان کا مؤقف ہے کہ اس طرح کے غیر ذمہ دارانہ بیانات سے نہ صرف ان کی ذاتی زندگی بلکہ بطور قومی کرکٹر ان کی پیشہ ورانہ ساکھ کو بھی شدید نقصان پہنچ سکتا ہے۔

خوشی مکھرجی کے متنازع دعوے پر قانونی ردِعمل

سوریا کمار یادو کے وکلاء کا کہنا ہے کہ خوشی مکھرجی کی جانب سے یہ دعویٰ کیا گیا کہ کرکٹر انہیں ماضی میں بار بار پیغامات بھیجا کرتے تھے، سراسر بے بنیاد اور جھوٹ ہے۔ وکلاء کے مطابق اس قسم کے بیانات عوام میں غلط تاثر پیدا کرتے ہیں اور ایک بین الاقوامی سطح کے کرکٹر کی عزت اور وقار کو متاثر کر سکتے ہیں، اسی لیے ہتکِ عزت کا مقدمہ دائر کیا گیا ہے۔

بھارتی میڈیا کے مطابق سوریا کمار یادو نے عدالت سے مطالبہ کیا ہے کہ اداکارہ کو ایسے بیانات دینے سے روکا جائے اور انہیں مالی ہرجانہ ادا کرنے کا پابند بنایا جائے۔

اداکارہ خوشی مکھرجی کا مؤقف اور میڈیا گفتگو

واضح رہے کہ متنازع ملبوسات اور بیانات کے باعث خبروں میں رہنے والی اداکارہ خوشی مکھرجی نے ایک حالیہ تقریب کے دوران میڈیا سے گفتگو میں دعویٰ کیا تھا کہ ماضی میں سوریا کمار یادو انہیں کافی زیادہ پیغامات بھیجا کرتے تھے، تاہم اب دونوں کے درمیان کوئی رابطہ نہیں ہے۔

ایک سوال کے جواب میں کہ آیا وہ کسی کرکٹر کو ڈیٹ کرنا چاہیں گی، خوشی مکھرجی نے اس کی سختی سے تردید کرتے ہوئے کہا کہ وہ کسی بھی کرکٹر کے ساتھ تعلق نہیں رکھنا چاہتیں۔ ان کا کہنا تھا کہ کئی کرکٹرز ان کے پیچھے ہیں اور سوریا کمار یادو بھی انہیں میسجز کیا کرتے تھے، لیکن اب وہ کسی قسم کے تعلق میں دلچسپی نہیں رکھتیں۔

سوریا کمار یادو کی ذاتی زندگی اور پس منظر

اداکارہ کے دعوے کے بعد ابتدا میں سوریا کمار یادو کی جانب سے کوئی فوری ردِعمل سامنے نہیں آیا تھا، تاہم بعد ازاں قانونی راستہ اختیار کرتے ہوئے انہوں نے ہتکِ عزت کا مقدمہ دائر کر دیا۔
یہ بھی واضح رہے کہ سوریا کمار یادو شادی شدہ ہیں اور حال ہی میں وہ اپنی اہلیہ دیویشا شیٹی کے ہمراہ ایک مشہور مندر کے دورے پر بھی گئے تھے، جس کی تصاویر سوشل میڈیا پر وائرل ہوئیں۔

قانونی ماہرین کے مطابق یہ کیس بھارتی کھیل اور شوبز انڈسٹری میں ایک اہم مثال بن سکتا ہے، کیونکہ سوشل میڈیا پر کیے گئے دعووں کے قانونی نتائج اب زیادہ سنجیدگی اختیار کر چکے ہیں۔