اپوزیشن رہنماؤں کی پریس کانفرنس، ضمنی الیکشن، گورننس اور انتخابی شفافیت پر سنگین الزامات

فوٹو : اسکرین گریب 

اسلام آباد: پاکستان میں اپوزیشن کے رہنماؤں نے خیبر پختونخوا ہاؤس میں اہم پریس کانفرنس کرتے ہوئے ملک کی موجودہ سیاسی صورتحال، ضمنی الیکشن 2025، اور گورننس کے طریقہ کار پر شدید تنقید کی۔ پریس کانفرنس میں مصطفیٰ نواز کھوکھر اور  تیمور جھگڑا نے حکومت اور الیکشن کمیشن پر الزامات عائد کرتے ہوئے کہا کہ ملک میں آئین و قانون کو پسِ پشت ڈال دیا گیا ہے اور عوام کا ووٹ چوری کیا جا رہا ہے۔

مصطفیٰ نواز کھوکھر نے کہا کہ “اس وقت ملک میں آئین، قانون اور عدلیہ ہر چیز بے معنی کردی گئی ہے“۔ انہوں نے ضمنی الیکشن کو عوام کے حقِ رائے دہی پر حملہ قرار دیتے ہوئے کہا کہ “آج ہم نے پاکستانی عوام سے ووٹ کا حق چھین لیا“۔

انہوں نے مزید کہا کہ حکومت کے طرزِ حکمرانی پر آئی ایم ایف کی سخت رپورٹ نے بھی سوالات اٹھا دیے ہیں۔ ان کا کہنا تھا کہ “جس ملک میں پانچ ہزار سے چھ ہزار ارب روپے کی کرپشن ہو، وہاں کیا حال ہوگا؟“۔

آزاد کشمیر کے سیاسی بحران کا ذکر کرتے ہوئے کھوکھر نے کہا کہ وہاں لوگوں کو “بھیڑ بکریوں کی طرح دوسری پارٹی میں شامل کیا گیا“، نتیجتاً عوام نے خود نظام اپنے ہاتھ میں لے لیا۔ انہوں نے خبردار کیا کہ “ایسا نہ کریں کہ یہاں بھی وہی نوبت آئے“۔

تیمور جھگڑا کے انتخابی عمل پر اعتراضات،تضادات کی ویڈ یو چلادی

پریس کانفرنس میں تیمور جھگڑا نے ضمنی انتخابات کے نتائج اور شفافیت سے متعلق تفصیلی بریفنگ دی اور الیکشن نتائج کے مبینہ تضادات کی ویڈیو بھی دکھائی۔

ان کا کہنا تھا کہ “ریاست میں وزیر اعلیٰ وزیراعظم کے بعد دوسری بڑی پوزیشن ہے، مگر دو روز پہلے وزیر اعلیٰ کو عمران خان سے ملنے نہیں دیا گیا“۔

انہوں نے دعویٰ کیا کہ ہری پور کے نتائج میں واضح بے ضابطگیاں ہیں۔ جھگڑا نے الزام لگایا کہ:

• “600 فارم 45 کی ایک کتاب ہم نے تیار کی ہے، اصل نتیجہ ہمارے پاس ہے“

• “عمر ایوب کو 1 لاکھ 49 ہزار 782 ووٹ ملے جبکہ بابر نواز کے ووٹ 1 لاکھ 24 ہزار 686 رہے“

• “ہم نے ہری پور میں 25 ہزار ووٹ کی لیڈ لی ہے“

تیمور جھگڑا کے مطابق فارم 45، 46 اور 47 نہ ریلیز ہوئے اور نہ الیکشن کمیشن کی ویب سائٹ پر اپ لوڈ کیے گئے۔

انہوں نے دعویٰ کیا کہ ہری پور میں ڈیٹا انٹری کے دوران مکمل سیل لگا دی گئی، کسی کو قریب جانے نہیں دیا گیا، اور جب وہ بی فارم کی کاپی مانگنے گئے تو انہیں کوئی کاپی فراہم نہیں کی گئی۔

جھگڑا نے مزید کہا کہ:
“آر او اپنی مرضی کے نتائج خود سے ڈالتا رہا، فارم 47 ہمارے ملک کی سب سے بڑی گالی بن گیا ہے“۔

انہوں نے شفاف انتخابات کی ضرورت پر زور دیتے ہوئے کہا:
“ہم ایسا الیکشن چاہتے ہیں کہ ڈبے میں جو ووٹ ڈالا جائے وہی باہر نکلے“۔

انہوں نے یہ بھی کہا کہ لاہور میں پی ٹی آئی انتخابی مہم نہیں چلا سکی جبکہ “مسلم لیگ ن اور کیپٹن (ر) صفدر اپنی مرضی سے مہم کرتے رہے“۔

اپوزیشن رہنماؤں کی پریس کانفرنس، ضمنی الیکشن، گورننس اور انتخابی شفافیت پر سنگین الزامات