پاکستان کو افغان طالبان سے 6 نومبر کے مذاکرات میں مثبت نتائج کی امید ہے، ترجمان دفترِ خارجہ

فوٹو : مسکرین شاٹ

اسلام آباد: دفترِ خارجہ کے ترجمان طاہر اندرابی نے کہا ہے کہ پاکستان کو امید ہے کہ 6 نومبر کو افغان طالبان کے ساتھ ہونے والے مذاکرات کے اگلے دور سے مثبت نتائج حاصل ہوں گے۔

ہفتہ وار پریس بریفنگ میں طاہر اندرابی نے بتایا کہ پاکستان مصالحتی عمل میں اپنا کردار بھرپور طریقے سے ادا کرتا رہے گا اور استنبول مذاکرات کے بعد امید ہے کہ آئندہ دور نتیجہ خیز ثابت ہوگا۔

انہوں نے کہا کہ پاکستان اور طالبان حکومت کے درمیان مذاکرات کا دوسرا دور استنبول میں ثالثوں کی موجودگی میں مکمل ہوا۔ یہ مذاکرات 25 اکتوبر سے شروع ہوئے اور ابتدائی طور پر دو روز کے لیے طے تھے، تاہم معاہدے تک پہنچنے کی سنجیدہ کوششوں کے باعث بات چیت چار دن تک جاری رہی۔

ترجمان نے کہا کہ پاکستان نے مذاکرات میں مثبت نیت کے ساتھ حصہ لیا مگر اپنی اس بنیادی پوزیشن پر قائم رہا کہ افغان سرزمین پاکستان کے خلاف دہشت گردی کے لیے استعمال نہیں ہونی چاہیے۔

انہوں نے واضح کیا کہ پاکستان کسی نئی کشیدگی کا خواہاں نہیں، البتہ طالبان حکومت سے توقع ہے کہ وہ بین الاقوامی وعدوں کی پاسداری کرتے ہوئے دہشت گرد تنظیموں — خصوصاً فتنۃ الخوارج اور فتنۃ الہندوستان — کے خلاف ٹھوس اور قابلِ تصدیق اقدامات کرے۔

طاہر اندرابی کے مطابق پاکستان گزشتہ چار برسوں سے مسلسل طالبان حکومت سے مطالبہ کر رہا ہے کہ وہ اپنی سرزمین پر موجود دہشت گرد عناصر کے خلاف فیصلہ کن کارروائی کرے۔

انہوں نے بتایا کہ پاکستان نے بارہا افغان حکام کو ان تنظیموں کی قیادت کی افغانستان میں موجودگی سے متعلق قابلِ تصدیق معلومات فراہم کیں، مگر یقین دہانیوں کے باوجود افغان سرزمین سے پاکستان میں دہشت گرد حملوں میں اضافہ ہوا ہے۔

ترجمان دفتر خارجہ نے مزید کہا کہ اکتوبر کے دوران افغان علاقے سے پاکستانی سرحدی علاقوں پر بلااشتعال حملے کیے گئے، جن کا پاکستان نے مؤثر جواب دیا۔

طاہر اندرابی نے کہا کہ پاکستان امن کا خواہاں ہے مگر اپنی خودمختاری اور عوام کے تحفظ کے لیے ہر ممکن اقدام کرے گا۔ انہوں نے 6 نومبر کے مذاکرات میں مثبت پیش رفت کی امید ظاہر کرتے ہوئے قطر اور ترکی کے تعمیری کردار کو بھی سراہا۔

پاکستان کو افغان طالبان سے 6 نومبر کے مذاکرات میں مثبت نتائج کی امید ہے، ترجمان دفترِ خارجہ