دل کے آپریشنز کرنے والا سرجن دوران ڈیوٹی دل کا دورہ پڑنے سے انتقال کرگیا

فوٹو : فائل

چِنئی : بھارتی ریاست تمل ناڈو کے شہر چِنئی میں دورانِ ڈیوٹی کارڈیالوجسٹ ڈاکٹر گریڈلن رائے دل کا دورہ پڑنے سے انتقال کرگئے

 چِنئی کے ایک اسپتال میں ماہر امراضِ قلب ڈاکٹر گریڈلن رائے دورانِ ڈیوٹی دل کا دورہ پڑنے کے باعث انتقال کرگئے۔ بھارتی میڈیا کے مطابق 39 سالہ ڈاکٹر گریڈلن رائے معمول کے مطابق اسپتال میں مریضوں کا معائنہ کر رہے تھے کہ اچانک زمین پر گر گئے۔

ساتھی ڈاکٹروں نے فوری طور پر انہیں ابتدائی طبی امداد دی اور جان بچانے کے لیے ہر ممکن جدید طبی سہولت فراہم کی۔

اس دوران سی پی آر، ایمرجنسی انجیو پلاسٹی، اسٹنٹنگ، انٹرا-آورٹک بیلون پمپ اور ای سی ایم او تک استعمال کیا گیا، تاہم دل کی مرکزی شریان کے 100 فیصد بلاکیج کے باعث ڈاکٹر گریڈلن رائے کو نہ بچایا جا سکا۔

نیورولوجسٹ ڈاکٹر سدھیر کمار کے مطابق یہ واقعہ اس بات کا ثبوت ہے کہ اچانک دل کا دورہ ایک ’’خاموش قاتل‘‘ کی صورت اختیار کرتا جا رہا ہے، جو نہ تو پیشگی علامات ظاہر کرتا ہے اور نہ ہی کسی کے لیے وقت سے پہلے اندازہ لگانا ممکن ہوتا ہے۔

سینئر بھارتی ڈاکٹرز کا کہنا ہے کہ یہ کوئی انفرادی واقعہ نہیں بلکہ ایک تشویشناک رجحان ہے کہ 30 اور 40 سال کی عمر میں بھی نوجوان دل کے امراض کا شکار ہو رہے ہیں۔

ماہرین کے مطابق ڈاکٹروں میں دل کی بیماریوں کے بڑھتے رجحان کی بڑی وجہ طویل اوقاتِ کار ہیں۔ بیشتر ڈاکٹرز روزانہ 12 سے 18 گھنٹے جبکہ بعض اوقات 24 گھنٹے تک مسلسل کام کرتے ہیں۔

اس کے ساتھ ساتھ شدید ذہنی دباؤ، زندگی اور موت کے فیصلوں کا بوجھ، مریضوں اور ان کے اہل خانہ کی بلند توقعات اور قانونی پیچیدگیاں بھی ان کے لیے بڑے نفسیاتی اور جسمانی دباؤ کا سبب بنتی ہیں۔

دل کے آپریشنز کرنے والا سرجن دوران ڈیوٹی دل کا دورہ پڑنے سے انتقال کرگیا