فیلڈ مارشل سید عاصم منیر کا پنجاب کے سیلاب متاثرہ علاقوں کا دورہ، مذہبی مقامات کی بحالی کا اعلان

فوٹو : آئی ایس پی آر

راولپنڈی : فیلڈ مارشل سید عاصم منیر نے پنجاب کے سیلاب سے متاثرہ علاقوں کا دورہ کیا اور متاثرین سے ملاقات کے ساتھ ساتھ سیلابی صورتحال کا جائزہ لیا۔

انہوں نے واضح کیا کہ سیلاب سے متاثرہ تمام مذہبی مقامات کو اصل حالت میں بحال کیا جائے گا، جبکہ دربار صاحب کرتارپور کو ترجیحی بنیادوں پر بحال کیا جائے گا۔

پاک فوج کے شعبہ تعلقات عامہ (آئی ایس پی آر) کے مطابق، فیلڈ مارشل سید عاصم منیر نے سیالکوٹ سیکٹر، شکرگڑھ، نارووال اور کرتارپور کے علاقوں کا دورہ کیا۔

اس موقع پر انہیں موجودہ صورتحال اور آئندہ بارشوں کے سلسلے میں تیاریوں پر تفصیلی بریفنگ دی گئی۔

آرمی چیف نے علاقے کی متاثرہ سکھ برادری سے بھی ملاقات کی اور کہا کہ اقلیتوں اور ان کے مذہبی مقامات کا تحفظ ریاست اور اس کے اداروں کی اولین ذمہ داری ہے، پاکستان اس فرض کی ادائیگی میں کوئی کمی نہیں چھوڑے گا۔

انہوں نے مزید کہا کہ ریاست اقلیتوں کے مذہبی ورثے اور عبادت گاہوں کے تحفظ کے لیے ہر ممکن اقدام کرے گی تاکہ متاثرہ کمیونٹیز کو فوری ریلیف مل سکے۔

آئی ایس پی آر کے مطابق، فیلڈ مارشل سید عاصم منیر نے سول انتظامیہ کے نمائندوں سے گفتگو کرتے ہوئے بروقت اور فعال اقدامات پر انتظامیہ کی تعریف کی اور سیلاب متاثرین کے لیے ریسکیو و ریلیف آپریشن میں مزید تیزی لانے کی ہدایت دی۔

فیلڈ مارشل سید عاصم منیر کا پنجاب کے سیلاب متاثرہ علاقوں کا دورہ، مذہبی مقامات کی بحالی کا اعلان