عمران خان کو جیل میں ڈاکٹروں سے ملاقات کی اجازت ہے اور نہ ہی بہنوں سے،درخواست دائر

فوٹو : فائل

اسلام آباد : پاکستان تحریک انصاف (پی ٹی آئی) نے مؤقف اختیار کیا ہے کہ بانی پی ٹی آئی عمران خان کو جیل میں ڈاکٹروں سے ملاقات کی اجازت ہے اور نہ ہی بہنوں سے،درخواست دائر کردی گئی ۔

اس سلسلے میں پی ٹی آئی کے وکیل تابش فاروق نے سی پی او کو بذریعہ ڈاک درخواست ارسال کی ہے جس میں سپرنٹنڈنٹ جیل غفور انجم، اے ایس پی زینب سمیت دیگر پولیس افسران کو نامزد کیا گیا ہے۔

درخواست کے متن میں کہا گیا ہے کہ بانی پی ٹی آئی کو جیل میں قواعد کے مطابق سہولیات فراہم نہیں کی جا رہیں اور نہ ہی انہیں طبی ماہرین سے ملنے دیا جا رہا۔ پولیس اور جیل حکام ہائیکورٹ کے احکامات کی خلاف ورزی کر کے توہین عدالت کے مرتکب ہو رہے ہیں۔

مزید کہا گیا ہے کہ وزیر اعلیٰ پنجاب مریم نواز اپنی تقاریر میں عمران خان کو ’فتنہ‘ قرار دے چکی ہیں، جبکہ اے ایس پی اور دیگر پولیس اہلکار ان کی بہنوں کو جیل سے دور ناکوں پر روک لیتے ہیں۔

درخواست کے مطابق علیمہ خان، نورین خانم اور ڈاکٹر عظمی کو پولیس اہلکار ہراساں کرتے ہیں اور بعض مواقع پر انہیں اغوا کر کے سنسان جگہوں پر چھوڑ دیا گیا۔

پی ٹی آئی نے مطالبہ کیا ہے کہ تمام نامزد افسران کے خلاف مقدمہ درج کر کے قانونی کارروائی کی جائے۔