پاکستان میں مقیم پی او آر کارڈ ہولڈرز افغان شہریوں کے انخلا کی ڈیڈلائن کا اعلان

فوٹو : فائل اے آئی 

اسلام آباد: پاکستان میں مقیم پی او آر کارڈ ہولڈرز افغان شہریوں کے انخلا کی ڈیڈلائن کا اعلان، پاکستانی حکام کی طرف سے یکم ستمبر آخری تاریخ، حکومت پاکستان کا بڑا فیصلہ کیا گیا ہے.

پاکستان نے پی او آر (PoR) کارڈ ہولڈرز اور دیگر غیر قانونی مقیم افغان شہریوں کے انخلا کے لیے یکم ستمبر 2025 کی حتمی ڈیڈلائن مقرر کر دی ہے۔

حکومت کی جانب سے اس فیصلے کا مقصد ملک میں غیر قانونی تارکین وطن کے مسئلے کو حل کرنا اور قانونی رہائش کے نظام کو مزید موثر بنانا ہے۔

حکام نے اعلان کیا ہے کہ ملک میں موجود تمام افغان شہریوں کو رضاکارانہ طور پر واپس جانے کا موقع دیا جا رہا ہے۔

انخلا کے دوران کسی بھی قسم کی بدسلوکی یا زبردستی سے گریز کیا جائے گا، جبکہ واپسی کرنے والوں کے لیے خوراک، صحت اور سفری سہولیات کی فراہمی کو بھی یقینی بنایا گیا ہے۔

حکومتی ذرائع کے مطابق، پاکستان میں غیر قانونی طور پر مقیم افراد کی نشاندہی کا عمل مکمل کر لیا گیا ہے، اور تمام متعلقہ افغان شہریوں سے اپیل کی گئی ہے کہ وہ خود کو قانونی کارروائی سے بچانے کے لیے مقررہ وقت میں واپسی کے اقدامات کریں۔

حکام کی جانب سے کہا گیا ہے کہ "تمام افغان PoR کارڈ ہولڈرز اور دیگر غیر قانونی طور پر مقیم افراد، یکم ستمبر 2025 سے قبل ملک چھوڑ دیں، تاکہ کسی قسم کی قانونی یا انتظامی کارروائی سے بچا جا سکے۔”