بانی پی ٹی آئی عمران خان پر مبینہ جبر ناروا کے مرتکب جیلر نے اضافی سکیورٹی مانگ لی

فوٹو : فائل

اسلام آباد : بانی پی ٹی آئی عمران خان پر مبینہ جبر ناروا کے مرتکب جیلر نے اضافی سکیورٹی مانگ لی، روزنامہ جنگ کی رپورٹ کے مطابق تحریک انصاف کے احتجاج کے پیش نظر اڈیالہ جیل کے سپرنٹنڈنٹ نے پنڈی پولیس کو اضافی سکیورٹی کیلئے خط ارسال کیا ہے۔

رپورٹ کے مطابق سپرنٹنڈنٹ اڈیالہ جیل عبدالغفور انجم نے سی پی او راولپنڈی کو خط میں کہا ہے کہ پی ٹی آئی نے 5 اگست کو جیل کے باہر مظاہرے کی منصوبہ بندی کی ہے، اڈیالہ جیل کے باہر اضافی پولیس تعینات کی جائے اور بیریئرز لگائے جائیں۔

خط میں کہا گیا ہے کہ سیاسی اور دہشت گرد قیدیوں کی موجودگی کے باعث اڈیالہ جیل انتہائی حساس ہے، جیل کے باہر غیر قانونی اجتماعات روکنے کےلیے کارروائی کی جائے، داہگل چیک پوسٹ سے اڈیالہ جیل کے گیٹ نمبر 5 تک اضافی سیکیورٹی تعینات کی جائے۔

انتظامیہ نے اڈیالہ جیل کے باہر احتجاج روکنے کیلئے دفعہ 144 نافذ کی ہے، اڈیالہ جیل میں 7700 قیدی موجود ہیں جبکہ گنجائش صرف 2174 کی ہے.

کسی بھی ناخوشگوار واقعے سے بچنے کیلئے سیکیورٹی کے فول پروف انتظامات کیے جائیں، سیکیورٹی کیلئے ہوم ڈپارٹمنٹ، آئی جی جیل خانہ جات اور آر پی او سے بھی درخواست کی گئی ہے.

واضح رہے سپرنٹنڈنٹ اڈیالہ جیل عبدالغفور انجم پر بانی پی ٹی آئی عمران خان اور پاکستان تحریک انصاف کی طرف سے الزام لگایا گیا ہے کہ جب سے وہ تعینات ہوئے ہیں عمران خان پر پابندیوں اور جبر ناروا میں اضافہ ہوا ہے تاہم اسی دوران ہی ان سے ان کے بیٹوں کی فون پر بات کروائی گئی اور اخبارات بھی بحال ہونے کی اطلاعات ہیں.