جنوبی افریقہ آسٹریلیا کوہرا کر ورلڈ چیمپئن شپ آف لیجنڈز کے فائنل میں پہنچ گیا

فوٹو: اسکرین شاٹ

برمنگھم : جنوبی افریقہ آسٹریلیا کوہرا کر ورلڈ چیمپئن شپ آف لیجنڈز کے فائنل میں پہنچ گیا، دوسرے سیمی فائنل میں جنوبی افریقا چیمپئنز نے آسٹریلیا چیمپئنز کو سنسنی خیز مقابلے کے بعد ایک رن سے شکست دی۔

برمنگھم انگلینڈ میں کھیلے گئے ورلڈ چیمپئن شپ آف لیجنڈز کے دوسرے سیمی فائنل میں جنوبی افریقا چیمپئنز نے آسٹریلیا چیمپئنز کے خلاف ٹاس جیت کر بیٹنگ کا فیصلہ کیا۔

جنوبی افریقا چیمپئنز نے مقررہ 20 اوورز میں 8 وکٹوں کے نقصان پر 186رنز اسکور کیے۔مورنی وین ویک 76 رنز کے ساتھ نمایاں رہے۔اسٹمس نے 57 رنز کی اننگز کھیلی۔

جنوبی افریقہ کی طرف سے دئیے گئے 187 رنز کےہدف کے جواب میں آسٹریلیا چیمپئنز صرف ایک رن کے خسارے سے مات کھا گیا۔

ہدف کے تعاقب میں آسٹریلیا چیمپئنز نے 7 وکٹوں کے نقصان پر 185 رنز بنائے۔ڈینیئل کرسچن 49 رنزکے ساتھ نمایاں رہے۔

آسٹریلیا چیمپئنز کے خلاف ایک رن سے کامیابی کے ساتھ جنوبی افریقا چیمپئنز نے ایونٹ کے فائنل کے لیے کوالیفائی کرلیا جہاں ہفتے کو اس کا مقابلہ پاکستان چیمپئنز سے ہوگا۔

واضح رہے کہ ورلڈ چیمپئن شپ آف لیجنڈز کے پہلے سیمی فائنل میں بھارت نے پاکستان کے ساتھ کھیلنے سے انکار کر دیا تھا جس کے بعد پاکستان چیمپئنز نے فائنل کیلئے کوالیفائی کرلیا تھا.