بھارت لیگ میچ کے بعد سیمی فائنل سے بھی فرار،پاکستان فائنل میں پہنچ گیا

فوٹو : سوشل میڈیا

برمنگھم : بھارت لیگ میچ کے بعد سیمی فائنل سے بھی فرار،پاکستان فائنل میں پہنچ گیا ، انڈیا پاکستان کیخلاف میچ کھیلنے سے انکار کے باوجود منتظمین کی طرف سے خیرات میں ملنے والے پوائنٹ کی بدولت گرتے پڑتے سیمی فائنل میں پہنچا تھا. 

ورلڈ چیمپئن شپ آف لیجنڈز 2025 کے بیان کے مطابق انگلینڈ میں جاری ورلڈ چیمپئن شپ آف لیجنڈز میں بھارت نے سیمی فائنل سے دستبردار ہونے کا اعلان کیا ہے.

اس سے قبل اہم میچ میں بھارتی چیمپئنز نے ویسٹ انڈیز چیمپئنز کو شکست دے کر ٹورنامنٹ کے سیمی فائنل کیلئے کوالیفائی کیا تھا۔

ویسٹ انڈیز نے پہلے کھیلتے ہوئے بھارتی لیجنڈز کو مقررہ 20 اوورز میں 145 رنز کا ہدف دیا، بھارت کو یہ ہدف 14.1 اوورز کے اندر مکمل کرنا ضروری تھا تاکہ بہتر رن ریٹ کی بنیاد پر وہ سیمی فائنل کے لیے کوالیفائی کر سکے۔

بھارت نے اسٹورٹ بنی کی شاندار نصف سنچری کی بدولت ہدف 13.2 اوورز میں 5 وکٹوں کے نقصان پر حاصل کرلیا اور ساتھ ہی سیمی فائنل میں پہنچنے والی چوتھی اور آخری ٹیم بن گئی۔

دوسری طرف منگل کو ہی پاکستان چیمپئنز نے آسٹریلیا چیمپئنز کو 10 وکٹوں سے شکست دے کر پوائنٹس ٹیبل پر پہلی پوزیشن حاصل کی، آسٹریلیا اور جنوبی افریقا پہلے ہی سیمی فائنل کیلئے کوالیفائی کرچکے تھے۔

ایونٹ کے پہلے سیمی فائنل میں پوائنٹس ٹیبل کی ٹاپ ٹیم پاکستان اور ٹیبل پر چوتھے نمبر پر موجود بھارت 31 جولائی کو آمنے سامنے ہونا تھا، دوسرا سیمی فائنل اسی روز جنوبی افریقا اور آسٹریلیا کے درمیان ہوگا۔

واضح رہے کہ بھارتی کرکٹر شیکھر دھون، یوسف پٹھان، عرفان پٹھان اور ہربجھن سنگھ نے پاکستان کے خلاف میچ کھیلنے کی مخالفت کی تھی۔