ن لیگ، جےیوآئی اور پیپلز پارٹی کا امن کیلئے کے پی حکومت کی اے پی سی میں شرکت سے انکار

فوٹو : سوشل میڈیا

پشاور : ن لیگ، جےیوآئی اور پیپلز پارٹی کا امن کیلئے کے پی حکومت کی اے پی سی میں شرکت سے انکار ، عوامی نیشنل پارٹی کا بھی خیبرپختونخوا حکومت کی آل پارٹیزکانفرنس میں شرکت نہ کرنے کا فیصلہ۔

اے این پی کے صوبائی صدر میاں افتخار کا کہنا تھاکہ آل پارٹیز کانفرنس پی ٹی آئی نے نہیں حکومت کی جانب سے بلائی گئی ہے۔
اور کےپی حکومت نے تمام فیصلہ کرلیے ہیں، اب آل پارٹیز کانفرنس کی ضرورت نہیں.

انھوں نے کہا کہ ہم حکومت کی جانب سے بلائی گئی ای پی سی میں شرکت نہیں کریں گے۔جمعیت علمائے اسلام نے بھی اے پی سی میں شرکت سے انکار کردیا اور ترجمان نے کہاکہ جے یو آئی تحریک انصاف کی آل پارٹیز کانفرنس میں شرکت نہیں کرے گی۔

ان کے علاوہ پیپلزپارٹی اور مسلم لیگ (ن)نے بھی آل پارٹیز کانفرنس کا بائیکاٹ کردیا۔ پی پی کے صوبائی صدر محمد علی شاہ باچا کا کہنا تھاکہ صوبائی حکومت غیر سنجیدہ ہے، آل پارٹیز کانفرنس صرف دکھاوا ہے، پیپلزپارٹی کل ہونے والی اے پی سی میں شرکت نہیں کرے گی۔

ن لیگ کے ایڈیشنل سیکرٹری اطلاعات ارباب خضرحیات کا کہنا تھاکہ ن لیگ اے پی سی میں شرکت نہیں کرے گی، پی ٹی آئی صوبے کے ساتھ مخلص نہیں ہے، عوام کی آنکھوں میں دھونک ڈالنے کو شش ہے، پی ٹی آئی اپنی حکو مت بچانے کی خاطر اے پی سی بلانے کا ڈرامہ رچا رہی ہے۔

قومی وطن پارٹی کی جانب سے مرکزی سیکرٹری اطلاعات طارق خان آل پارٹیز کانفرنس میں پارٹی کی نمائندگی کریں گے۔

واضح رہے کہ خیبرپختونخوا حکومت کی جانب سے صوبے میں امن و امان کی صورتحال پر آج آل پارٹیزکانفرنس بلائی گئی ہے۔

آل پارٹیزکانفرس میں امن وامان کی صورتحال سمیت دیگر مسائل پر غور ہوگا اور سیاسی جماعتوں اور مختلف مکاتب فکر کو دعوت نامے ارسال کیے گئےہیں۔

اس حوالے سے وزیراعلیٰ علی امین گنڈاپور کا کہنا تھاکہ دہشت گردی کیخلاف مؤثرحکمت عملی کیلئے تمام سیاسی قوتوں کو ایک پلیٹ فارم پر لانا ہوگا.

کل اے پی سی میں بریفنگ دیں گے کہ جب ہم آئے تو صوبے کے حالات کیا تھے۔انہوں نے کہا کہ جو اے پی سی میں نہیں آئے گا اس سے پتا چلے گا کہ انہیں عوام کا کوئی احساس نہیں.