۔ 26 نومبر احتجاج، بشریٰ بی بی کی عبوری ضمانت میں توسیع

فائل:فوٹو
اسلام آباد کی انسداد دہشت گردی عدالت نے پی ٹی آئی کے 26 نومبر کے احتجاج سے متعلق تین مقدمات میں بشریٰ بی بی کی 24 مارچ تک عبوری ضمانت میں توسیع کرتے ہوئے گرفتاری سے روک دیا ۔
انسداد دہشت گردی عدالت نمبر 1 کے ڈیوٹی جج طاہر عباس سپرا نے ضمانت قبل از گرفتاری کی درخواستوں پر سماعت کی۔ بشریٰ بی بی کے وکیل خالد یوسف نے عدالت کو بتایا کہ ان کی موکلہ 190 ملین پاوٴنڈ کیس میں پہلے ہی گرفتار ہیں اور عدالت میں پیش نہیں ہو سکتیں۔
وکیل نے مزید کہا کہ بشریٰ بی بی شاملِ تفتیش ہونا چاہتی ہیں، لہٰذا تفتیشی افسر کو ہدایت دی جائے کہ وہ انہیں اڈیالہ جیل میں ہی شاملِ تفتیش کریں۔عدالت نے دلائل سننے کے بعد بشریٰ بی بی کی عبوری ضمانت میں توسیع کرتے ہوئے 24 مارچ تک ان کی گرفتاری سے روک دیا۔
ضمانت قبل از گرفتاری کی درخواستوں پر آئندہ سماعت بھی 24 مارچ کو ہوگی۔
خیال رہے کہ بشریٰ بی بی کے خلاف تھانہ رمنا، تھانہ مارگلہ اور تھانہ کراچی کمپنی میں مقدمات درج ہیں۔