عمران خان کی اہلیہ بشریٰ بی بی اڈیالہ جیل سے رہا، پشاور پہنچ گئیں

فائل:فوٹو
راولپنڈی :بانی تحریک انصاف عمران خان کی اہلیہ بشریٰ بی بی اڈیالہ جیل سے رہا، پشاور پہنچ گئیں ۔بشری بی بی کو سفید رنگ کی لینڈ کروزر میں جیل سے روانہ کیا گیا۔ اس موقع پر جیل کے باہر سکیورٹی ہائی الرٹ کی گئی ۔

اسلام آباد میں اسپیشل جج سینٹرل نے توشہ خانہ ٹو کیس میں بشری بی بی کی رہائی کی روبکار جاری کرتے ہوئے انہیں رہا کرنے کا حکم دے دیا۔ جس کے بعد عدالتی عملہ بشریٰ بی بی کی رہائی کا روبکار لے کر اڈیالہ جیل پہنچا۔

اس موقع پر اڈیالہ جیل کے باہر سیکورٹی ہائی الرٹ کرتے ہوئے پولیس کے تازہ دم دستے اڈیالہ جیل گیٹ 5 پر تعینات کردیے گئے ہیں۔

بشریٰ بی بی کی رہائی سے قبل اڈیالہ جیل انتظامیہ نے روبکار موصول ہونے کے بعد قانونی کارروائی مکمل کرکے رہا کیا۔

گزشتہ روز اسلام آباد ہائی کورٹ نے توشہ خانہ ٹو کیس میں بشری بی بی کو ضمانت پر رہا کرنے کا حکم دیا تھا لیکن قانونی پراسیس آج مکمل ہونے پر رہا کیا گیا وہ پہلے بنی گالہ گئیں بعد میں پشاور چلی گئیں۔

ذرائع کے مطابق بشریٰ بی بی وزیر اعلیٰ ہاوس کی انیکسی میں قیام کریں گی اور اس دوران اپنے کان کی تکلیف کا علاج بھی کرائیں گی. 

بشری بی بی مجموعی طور پر 9 ماہ جیل میں رہیں۔ انہیں رواں سال 31 جنوری کو توشہ خانہ کیس میں 14 سال قید کی سزا ہوئی تھی۔

کمشنر اسلام باد نے بنی گالہ کو سب جیل قرار دیا تھا اور انہیں اڈیالہ جیل کے بجائے بنی گالہ منتقل کیا گیا تھا لیکن پھر کچھ عرصہ قید رہنے کے بعد بشری بی بی نے بنی گالہ کو سب جیل قرار دینے کے نوٹیفکیشن کو اسلام آباد ہائی کورٹ میں چیلنج کرتے ہوئے استدعا کی تھی کہ سب جیل قرار دینے کا نوٹیفکیشن کالعدم قرار دیتے ہوئے انھیں اڈیالہ جیل ہی منتقل کر دیا جائے جس پر انہیں اڈیالہ منتقل کیا گیا۔

اسلام آباد ہائی کورٹ نے بشری بی بی کی توشہ خانہ کیس میں سزا معطل کردی تھی جس کے بعد انہیں توشہ خانہ ٹو میں دوبارہ گرفتار کیا گیا تھا۔